– 30-åringane er sjukare enn 50-åringane
Skal ein tru Nav Vestland, er ikkje alltid dei eldste sjukast.
Det legemelde sjukefråværet i Kvam var ifølgje tal frå Nav Vestland på 6,1 prosent i 4. kvartal i 2023. Tala gjer Kvam til hardangerkommunen med høgast sjukefråvær. Askøy toppar lista med eit sjukefråvær på 7,7 prosent. I Ullensvang var sjukefråværet på 5,4 prosent.
I Kvam førte fråværet til at 12.559 av 204.690 avtala dagsverk gjekk tapt. I Ullensvang var tala 16.039 av 295.815 dagsverk.
I ei pressemelding skriv Nav Vestland at sjukefråværet i heile fylket var på 6,1 prosent. Det er ein auke frå 4. kvartal året før, då det var 5,9 prosent. Auken er størst blant kvinner. Muskel- og skjelettplager (32 prosent) og psykiske lidingar (24 prosent) førte til flest sjukmeldingar.
I fjerde kvartal 2023 hadde 30 åringane litt høgare sjukefråvær enn 50-åringane, skriv Nav i pressemeldinga. Helse- og sosialsektoren hadde høgast fråvær med 8,8 prosent.
