26 nye smittetilfelle i Bergen, men R-talet går ned

Det siste døgnet er det registrert 26 nye smittetilfelle i Bergen. Det er to under snittet for den siste veka.

20 av dei nye tilfella er nærkontaktar, fire har ukjend smitteveg og eitt tilfelle er importsmitte, opplyser Bergen kommune.

26 tilfelle er 8 fleire enn dagen før og 13 færre enn same dag for éi veke sidan. 1.781 personar testa seg i Bergen måndag.

Tysdag er 14 pasientar er lagde inn med koronasmitte i Helse Bergen, 13 ved Haukeland universitetssjukehus og éin på Voss sjukehus.

– 14 innlagde pasientar er eit høgt tal, men vi har kontroll og kapasitet, seier administrerande direktør Eivind Hansen i Helse Bergen.

Han seier analysane deira viser at dei vil ha sju til tolv innlagde dei neste fjorten dagane.

Ifølgje Helse Bergen har R-talet i regionen gått ned frå 1,3 til 1,1. R-talet fortel kor mange ein smitta person smittar vidare.

Så langt er det registrert 5.378 smittetilfelle i Bergen sidan koronapandemien starta.

(©NPK)