20 internasjonale lag kjem til Jondal
Fyrste etappe av sykkelrittet Tour of Norway 26.–29. mai vil gå frå Jondal til Hovden i Setesdal.
Det går fram av ein søknad til Statens vegvesen. Etappen skal gå via Utne og Odda.
Dagen før skal det vera prolog frå Bryggen i Bergen til Fløyen. Etter Jondal–Hovden-etappen går sykkelløpet frå Valle i Setesdal til Stavanger. Tredjeetappen vert avvikla i Stavanger, opplyser Tour of Norway.
Tidlegare ritt i området har vekt stor merksemd internasjonalt. Ni lag frå øvste nivå – World Tour – har stadfesta at dei kjem. Det er venta syklistar frå 15 nasjonar fordelte på 20 lag, til saman 120 deltakarar. Rittet vert sendt direkte på TV 2.
Sykkelrittet vil kverrsetja båe køyrefelt. Seks uniformerte politimotorsyklar og éin uniformert bil skal fylgja rittet. Ein stab på om lag tretti mobile vakter vil få ansvaret for å handtera trafikken. I tillegg vil eit stort tal løypevakter, stasjonære vakter og stasjonært politi vera til stades.
Tour of Norway skal planleggja detaljane i rittet saman med vegvesenet, fylkeskommunane, naudetatane, kollektivselskapa og dei råka kommunane.
