17. mai-stemning og overrasking på Norheimsund skule
Det var pynta til fest på Norheimsund skule på onsdag. Ikkje berre feira dei nasjonaldagen på førehand — dei overraska også rektoren med krone og song.
Når 17. mai-feiringa ikkje vert slik ein skulle ynskja, er ein nøydd til å snu seg rundt. På Norheimsund skule vart det laga til scene utandørs, og pynta med flagg og ballongar onsdag. Talar, song og flaggheising sette elevane i rette stemninga. Og så hadde dei ein hemmelegheit, alle saman.
— 17. mai er ei viktig hending i eit barns liv. I år tenker me at det er ekstra viktig å gjera slikt saman, seier Anne Cathrine Eiken.
Eiken, som har vore ansvarleg for opplegget, ynskte velkomen og heldt tråden i programmet. Då Anne Beth Hansen bles lyd i kornetten sin og gav til beste ein fanfare, og flagget vart heist av nokre elevar frå 5. trinnet, gjekk det eit gisp gjennom elevane. Etter dette sat dei som perler på ei snor gjennom heile programmet.
— Det var fantastisk kjekt å vera vitne til at borna kjende på at det var høgtideleg, seier Eiken.
Etter fleire flotte talar og songar vart rektor Svein Sekse følgd opp på scena. Der venta ein stol, ei bursdagskrone og gode ord både frå elevar og lærarar. Sekse fyller 60 år 14. mai.
