12 nye kommunar skal prøve fritidskortet
Til hausten blir prøveprosjektet med nasjonale fritidskort utvida med 12 nye kommunar.
Målet med prosjektet er å hente inn erfaringar til korleis ei nasjonal fritidskortordning bør innrettast. Ordninga er retta mot alle i aldersgruppa 6–18 år og skal dekkje utgifter knytt til faste, organiserte aktivitetar.
Regjeringa har sett av 180 millionar kroner til prøveprosjektet.
Artikkelen held fram under annonsen.
Kommunane som no skal med, er Sokndal og Kvinesdal i Sørlandet, Drammen, Modum og Råde i Viken, Stord, Bømlo og Fitjar i Vestland, Kautokeino i Troms og Finnmark, Lillehammer i Innlandet pluss Volda og Kristiansund i Møre og Romsdal.
Dei 12 kommunane som alt er med, er Arendal i Sørlandet, Vadsø i Troms og Finnmark, Asker og Halden i Viken, Fauske i Nordland, Kvam i Vestland, Namsos frå Trøndelag, bydel Grorud i Oslo, Skien i Vestfold og Telemark, Stor-Elvdal i Innlandet og Tromsø i Troms og Finnmark.
– Eg er glad vi har fått med fleire kommunar i testinga av fritidskortet. For at vi skal få eit godt prøveprosjekt treng vi ei samansetting av kommunar som er eit Noreg i miniatyr, seier barne- og familieminister Kjell Ingolf Ropstad (KrF).
Han gjer det klart at det er viktig mål for regjeringa at alle born og unge skal kunne delta på fritidsaktivitetar saman med andre på same alder, uavhengig av kor mykje foreldra tener eller kor store ressursar dei har til å følgje opp borna.
