112 skip kom til Hardanger
Hamnene Eidfjord, Rosendal og Ulvik hadde i år 112 anløp av cruisebåtar med om lag 150.000 passasjerar. Dette er på same nivå som i fjor.
– Neste år kjem me til å merka effekten av at Eidfjord vart nominert til Destination of the Year 2018, og også kom på topp ti-lista til magasinet Cruise Critic i år. Til no er det tinga 151 anløp i Hardangerfjorden med 225.000 passasjerar i 2020 og 107 anløp med 216.000 passasjerar i 2021, seier Helge Møller i Cruise Destination Hardangerfjord i eit presseskriv.
Eidfjord har sett ei øvre grense på to skip kvar dag. Skip som vert avviste i Eidfjord, vert tilrådde å gå til Ulvik eller Rosendal, og fleire gjer det.
Frå nyttår innfører Eidfjord miljødifferensierte avgifter i hamna. Det inneber at ein premierer miljøvenlege skip med rabattar opp til 20 prosent, og tilsvarande aukar avgiftene til 100 prosent når skipa skårar lågt på ein definert skala.