Vekst i lakseeksporten til Kina

Norsk lakseeksport til Kina har dei siste vekene opplevd jamn oppgang. 3.518 tonn fersk laks er så langt i år seld til Kina.

– Eksporten tek gradvise steg mot normaltilstand. Kina er kome over i ein annan fase enn resten av verda, seier fiskeriutsending i Kina, Victoria Braathen, til Intrafish.

Førre veke selde Noreg 519 tonn fersk laks (produktvekt) til Kina. Ifølgje Sjømatrådet gjer det landet til Noregs 12. største fersklaks-marknad i veke 13.

Statistikken viser ni veker med samanhengande vekst med lakseeksport til Kina. Han tek utgangspunkt i veke fem då eksporten til landet berre var 10 tonn.

– Vi har naturleg nok sett ei dreiing av konsumet frå ute til heime. Laksen har styrkt seg i daglegvarehandelen. Kina er dessutan spesielt ved at folk her meir enn elles i verda bestiller daglegvarer på døra ved hjelp av nett og mobil. Heime-karantene og oppmoding om å vere heime har fått utviklinga til å skyte fart, seier Braathen.

I fjor vart det selt 26.000 tonn laks til Kina. Verdien av eksporten i fjor var nesten 1,6 milliardar kroner.

(©NPK)