Rådmannen i Kvam herad har gjeve Fjord1 ASA dispensasjon frå plan- og bygningslova til støyande verksemd i samband med etablering av ein dykdalb — eit fortøyingspunkt i sjø — ved ferjekaien i Tørvikbygd.
Vilkåra er at dei som vert råka av støyen, skal varslast, og at dei som vert råka av støy på natt, ved behov skal få tilbod om alternativ overnatting.
Dersom eit behov for alternativ overnatting gjer seg gjeldande i løpet av tida arbeidet går føre seg, skal naboar som melder behov undervegs, òg få tilbod om det.
Norconsult AS har opplyst til heradet at anleggsperioden vil starta tidlegast 15. september. Ifølgje støyrapporten vil han vara i om lag åtte veker, opplyser samfunns- og utviklingssjef Jon Nedkvitne i Kvam herad.
Det skal utførast støymålingar som dokumenterer nivået for støyen. Rådmannen tek atterhald om at støyen ligg i det området som søkjaren har vist til i samband med tilsvarande anlegg andre stader. Ho ber om å få tilsendt støymålingar som vert utførte på staden dersom det vert avvik.
Det vart tidlegare gjort eit vedtak heimla i folkehelselova for tiltaket. Det var feil lov, og vedtaket vert no gjort på nytt, heimla i plan- og bygningslova.
