Sundagsfiske i Skårsvatnet

Politiet fekk sundag melding om at nokon fiska i Skårsvatnet på Soldal, meir kjent som «Gullfiskvatnet».

Det opplyser politioverbetjent Jarle Sjo Myklebust ved Kvam, Samnanger og Tysnes lensmannskontor. Meldaren hadde snakka med personane som fiska. Fiskarane påstod at det var lov å fiska der, men på informasjonstavla står det at fisking er forbode.

Det er Bergen og Omland Friluftsråd (BFO) som har laga informasjonsskiltet.

— Me laga informasjonsskiltet i samarbeid med lokale. Eg veit ikkje om det er gjort formelle vedtak, det har me ikkje sjekka opp i, seier John Frithjof Fosse, administrerande nestleiar i BOF.

Ifylgje BOF sine nettsider er det fem artar i vatnet: gullvederbuk, karuss, aure, ål og trepigga stingsild. Friluftsrådet skriv på sidene sine at det er ulovleg å fiska gullvederbuk.

Ålen er totalfreda.

— Fisking kan enda med at fisken forsvinn. Om ein ynskjer å ha turistattraksjonen i åra som kjem, bør ein absolutt ikkje fiska der, seier Fosse.

Politiet har ikkje oppretta sak.

— Eg har ikkje høyrt om dette før. Det er snodig at ein vel å fiska der, seier Myklebust.