Sju vil verta rektor på Kvam vidaregåande skule
Ingebjørg Bakke går av som rektor ved Kvam vidaregåande skule til sommaren. I alt sju personar har søkt om å ta over stafettpinnen.
Søkjarane er Gullik Kjellstadli, Hamid Salehpour, Evy Kleivane, Hilde Søraas, Arild Matland, Eyvind Eidhammer og Arne Vines. Evy Kleivane var rektor ved tidlegare Norheimsund vidaregåande skule.
Fylkeskommunen har som mål å fullføra tilsetjingsprosessen før sommarferien.
— Rektorstillinga er spennande med tanke på bygginga av ny vidaregåande skule i Kvam, noko som opnar for nye rammer og utviklingsmoglegheiter, seier Hillevi Elizabeth Runshaug.
Ho er områdeleiar i avdeling for opplæring og kompetanse i Vestland fylkeskommune. Ho fortel at fylkeskommunen har som ambisjon og mål at alle elevar som tek til i vidaregåande skule, skal fullføra, og at alle som er kvalifiserte, skal få læreplass. Kvam vidaregåande skule har ei viktig rolle lokalt og regionalt i samarbeid med kommune, arbeids- og næringsliv.
Den nye rektoren vil vera sentral i arbeidet med å utvikla eit framtidsretta skuletilbod, utvikla skulen som sentral utdanningsinstitusjon i lokalmiljøet og bidra til å oppfylla samfunnsoppdraget.
