Industri- og næringspartiet (INP), der Bjarte Helland frå Øystese er 1. nestleiar, vart registrert i partiregisteret 6. mai.
Partiet har fått over 5.000 støttefråsegner. 5.000 er talet på underskrifter som lova krev om ein skal stilla til val alle valdistrikt i det komande stortingsvalet.
Mellom dei politiske måla til INP er å sikra den norske arbeidsmarknaden og velferdsstaten betre enn i dag. Partiet vil gjenreisa tillita til det norske næringslivet og utvikla Distrikts-Noreg. INP vil vera ein garantist for utvikling og stabilitet, vera føreseieleg og jobba for redusert byråkrati og meir demokrati.
– Me vil ta eit oppgjer med dei gamle, trauste styringspartia som har fått lov å regjera på overtid. Landet vårt treng eit sentrumsorientert, moderat parti som vil prioritera Noreg, det norske næringslivet og norske arbeidsplassar, skriv partiet i programmet.
Partileiar og -grunnleggjar er Owe Ingemann Waltherzøe, offshorearbeidar og konserntillitsvald for dei tilsette i Equinor ASA.
