Kvam herad er ein av få
— Om ikkje ein kommune har eit godt samarbeid med frivillige lag og organisasjonar er det jammen mykje som stoppar opp, seier varaordførar Frode Nygård (Frp).
Berre to av ti kommunar har ein politikk for frivillig arbeid, skriv Frivillighet Norge i ei pressemelding. Éin av dei er Kvam herad. Gjennom koronapandemien har frivillige lag og foreiningar spela viktige roller i nærmiljøa. Det har vore arrangert aktivitetar for born og unge, eldre har lært seg å treffast på nett, folk har hjelpt til med handling og ein har avlasta helsevesenet.
Frivillighet Norge påpeikar at eit godt samarbeid mellom kommunen og dei frivillige er avgjerande for å lukkast. Likevel manglar mange kommunar struktur og verkemiddel for å få til gode samarbeid.
Nygård kan ikkje få rosa samarbeidet nok. Han seier at kommunane som ikkje har ein politikk for frivillig arbeid, ikkje veit kva ressursar som ligg unytta i samfunnet.
— Me ser at politikken verkar. Kommunar som har det, har meir samarbeid med frivillige og legg betre til rette for organisasjonane, seier Stian Slotterøy Johnsen, generalsekretær i Frivillighet Norge, i pressemeldinga.
