Innstilling om fartsgrenser er i kjømda

Ordførar Torgeir Næss (Ap) i Kvam purra 28. august Vestland fylkeskommune og spurde etter ei avgjerd i saka om fleksibel fartsgrense på fylkesveg 49 på Kvamskogen. Saka var på høyring i november i fjor, men er enno ikkje avgjord.

– Fartsgrensa er mellom anna premiss for utbyggingar, avkøyrsler og siktline, og det vil vera tenleg å få dette fastlagt, skriv Næss.

Heradsstyret i Kvam har tidlegare bede om at grensa ikkje vert lågare enn 70 kilometer i timen på strekkjene som i dag har 80-grense, og at det vert arbeidd vidare med å greia ut fleksibel fartsgrense.

Har teke si tid

HF kontakta leiar for utgreiing i Vestland fylkeskommune, Carl Erik Nielsen, for å få siste nytt i saka.

Han seier at roller, oppgåver og mynde – mellom anna knytte til fartsgrenser – har endra seg som fylgje av regionreforma, og det har gjort at det har teke lang tid å handsama spørsmålet om fartsgrenser på skogen.

Kvamskogen-saka har òg vore vanskeleg når det gjeld fleire andre forhold. Det har òg vore diskusjonar om ein mellombels gang- og sykkelveg til hjelp for mjuke trafikantar.

– Det kjem snart ei innstilling frå Vestland fylkeskommune der ein ser for seg å differensiera fartsgrensene til sommar- og vinterfartsgrenser. Den er ikkje langt vekke. Ho må sjåast litt ut ifrå gang- og sykkelvegen som er planlagd mellom Naf og Ungdomsheimen (som er riven, journ. merknad), seier Nielsen.

Kan verta fleksibelt

– Det vert ikkje fleksible skilt på Kvamskogen?

– Den endelege tekniske løysinga er ikkje heilt avklara enno. Det spørst kva me praktisk klarar å få til. Det kan verta det, men det kan òg verta eit regime ut frå ein årstidsskala med differensierte fartsgrenser. Det ser ut til at det går den vegen. Så er det beklageleg at det har teke så lang tid, men det får me skriva på kontoen for ny organisasjon og dialogen med Kvam herad og Fylkesmannen om gang- og sykkelveg mellom Naf og Ungdomsheimen, og motsegn, seier Nielsen.

– Det vert ikkje lenge, og eg reknar med at avisa di i løpet av eit par veker kan kunngjera korleis ting ser ut. Det er rett nok ein månad med høyring mellom fylkeskommunen og Statens vegvesen. Og det er og eit atterhald om at vegvesenet kan endra meining. Politiet er òg ein høyringspart. Men det er Statens vegvesen som gjer vedtaket, seier Nielsen.