Heimevernet planla ei øving i traktene kring Midthølen i Kvinnherad frå 10. til 13. november, med inntil 150 soldatar frå Kvinnherad og Indre Hardanger.
Det skriv avisa Kvinnheringen.
Fleire heimevernssoldatar frå Kvam skulle hit. No er øvinga avlyst på grunn av situasjonen med aukande covid-19-smitte i samfunnet, skriv Heimevernet til dei innkalla soldatane. All HV-trening og -øving er avlyst i veke 46 og 47. Det vil seia at det ikkje vert øving frå måndag 9. november til sundag 22. november. Kvinnheringen har tidlegare vore i kontakt med fleire soldatar som har vore uroa for å stilla på samling med andre soldatar frå ulike stader på Vestlandet samstundes med dei aukande smittetala i fylket.
– Det er bekymringsverdig og ikkje ideelt å gjennomføra øvingane samstundes som den generelle smitten i samfunnet aukar, seier avtroppande tillitsvald i HV-område 09, Kvinnherad og Indre Hardanger, Roger Røssland frå Husnes, til avisa.
