Ysteriet vann pris i Bergen
Hardanger Bygdeysteri vart kåra til årets lokalmatprodusent under Bergen Matfestival.
Ysteriet i Øystese har «truffet tidsånden» med satsinga på produktet Steikeost, ifylgje juryen.
Marit Buttingsrud tok imot prisen, som vart overrekt av fylkesordførar Jon Askeland og bergensordførar Linn Kristine Langley Engø under opninga av festivalen fredag.
– Ei skikkeleg vitamininnsprøyting! seier Buttingsrud til HF.
Verksemda med produksjonslokale i det tidlegare meieriet får ros for å våga å satsa når andre legg ned. Ho har forstått verdien av sambruk og fellesskap som grunnlag for eit produkt som vert selt langt utanfor vår region, meiner juryen.
Utmerkinga ser ut til å ha hatt effekt. Ysteriet vart nemleg utselt for både ost og burgarar laurdag ettermiddag. Helga enda med ny salsrekord, fortel dagleg leiar Marit Buttingsrud. Ysteriet selde 800–900 ostar, om lag to tredelar av dei i burgarform, og omsette for kring 160.000 kroner på to dagar. Osten vert produsert i tre variantar.
Buttingsrud hadde med seg fleire ungdomar i slekta som hjelpte til i Bergen, ettersom bøndene var opptekne med å utnytta det gode vêret til å hausta gras.
Komande helg reiser ysteriet for fyrste gong til Dyrsku'n i Seljord for å falby ost. Sidan går det slag i slag i september, med mellom anna torgdag i Norheimsund komande helg og Bondens Matfest i Oslo helga etter. Oppgåvene vert fordelte mellom dei som er involverte i ysteriet. I Oslo er fleire kvemmingar som går på skule på Ås, bedne om å hjelpa til.
