Vêr dukka opp på Rykkje
Endre Flotve og Kjetil Berge fann ein bortkomen vêr langs vegen ved Flotve. Det vart starten på eit lite mysterium.
– Det var ei artig historie heilt til me fann ut av det, fortel Berge.
I haust fann Kjetil Berge og Endre Flotve ein vêr dei ikkje kjende att. Ved hjelp av ei kraftfôrbøtte fekk Berge lokka vêren til seg.
Berge og Flotve frakta dyret opp til garden til Berge på Rykkje, og leita etter kjennemerke for å finna ut kven som eigde han. Berge såg på øyremerket til vêren. Dyret hadde berre eitt, og det viste at vêren tilhøyrde ein eigar ved Sandvinvatnet i Odda. Berge og Flotve ringde eigaren.
– Han skjønte ingenting og hevda at han aldri hadde selt vêren, fortel Berge.
Etter telefonsamtalen stod Berge att med fleire spørsmål enn svar. Korleis kunne ein vêr med tilhøyrsel i Odda koma seg over fjorden og enda opp på Rykkje?
– Me trudde kanskje at vêren hadde vandra i fjellet i to år og enda opp på Rykkje, fortel Berge og ler.
Kvar gong ein sau får ein ny eigar, skal sauen merkjast med nytt øyremerke, slik at eigaren kan sporast opp. Det var difor ingenting som tilsa at vêren hadde fått ny eigar.
Berge tenkte heller at dyret hadde vorte selt i nærområdet og stukke av.
Sakna vêr på Melstveit
Erling Børven bur på Melstveit. Han fortel om ein vêr han hadde henta i Odda hjå Kjell Inge Aase. Aase og Børven hadde bytt vêr med kvarandre i oktober. Då fekk begge nytte av kvar sin vêr i paringstida.
Vêren gjekk fint saman med sauene, fortel Børven. Han meinte at dyret hadde gjort det han skulle i paringstida.
– Ein dag var vêren plutseleg vekke, seier Børven.
Børven lurte på kor dyret hadde gjort av seg. Han fortel at vêren ikkje hadde på seg bjølla, så det var ikkje noko poeng i å leita etter han.
Seinare fekk Børven høyra at vêren var komen til Sandvinvatnet.
Kortreist vêr
Personen Flotve og Berge ringde, viste seg å vera den fyrste eigaren til vêren. Han hadde selt vêren til Aase i Odda. Aase og Børven bytte, som nemnt, vêr med kvarandre før paringstida i haust. Slik kom vêren til Aase seg over fjorden og til Melstveit. Vêren oppheldt seg på Melstveit før han stakk av og hamna på Rykkje.
Den fyrste eigaren kom og henta vêren same dag som han fekk telefon frå Flotve og Berge. Han tok dyret med seg til Sandvinvatnet.
Og der er vêren framleis, opplyser Børven.
