Vil gje gratis bedriftsrådgjeving for å hjelpa næringslivet
Næringshagen i Hardanger (NH) i Øystese har søkt om 200.000 kroner i stønad frå kraftfondet.
Pengane skal gå til å hjelpa verksemder i Hardanger som er råka av koronapandemien og tiltaka for å stoppa denne. Prosjektleiar og dagleg leiar Sigmund Vereide i NH har ført søknaden i pennen. Mange av verksemdene soknar til Kvam. NIH har gjennomført ei spørjeundersøking og snakka med dei, ifølgje søknaden.
Av dei 37 verksemdene i Kvam som var med på undersøkinga i regi av heradet og NH i mars, svara 51 prosent at dei ynskjer kort- eller langsiktig strategihjelp og 38 prosent at dei ynsker ein diskusjonspartnar. 35 prosent oppgjev at dei ynskjer samarbeidsråd og informasjon på tvers av bransjar.
NH vil mellom anna hjelpa verksemder med å få stønad, invitera til fysiske og digitale møte med ymse tema, gje råd om strategi og møta Kvam herad for å drøfta utviklinga.
Det vil vera trong for betre både kort- og langsiktig likviditet. Det er realistisk å tru at ein del verksemder ikkje vil klara omstillinga og gå konkurs, skriv Vereide.
– Mange reiselivsbedrifter har mista store delar av bestillingane for sommarsesongen i år. Mykje tyder på at krisa set djupe spor i endring av reisemønster og trendar, heiter det i søknaden.
Målet er å hjelpa minst 30 verksemder med i snitt 10 timar rettleiing.
Prosjektet budsjetterer med rettleiingskostnader på 100.000 kroner i både 2020 og 2021. 120.000 skal gå til kjøp av tenester, og kurshaldar. I alt kjem kostnadene på 500.000 kroner. NIH vonar på 200.000 kroner frå Kvam herad og 300.000 kroner frå fylkeskommunen.
Søknaden er ikkje mellom dei tre som rådmannen legg fram for heradsstyret i møtet tysdag. NH må difor venta til 16. juni på svar.
