Velvære under nytt tak

Ho har drive som hudterapeut i Kvam i åtte år. Dei fyrste fem åra jobba ho for Paloma i Øystese, før ho fylgde draumen og starta sin eigen salong i mai 2021. Lokalet til Hardanger Velvære AS var då over treningssenteret Attrå.

Lokala i det gule huset i Grova vart ledig etter at Ugler i mosen la ned drifta. Då var Rivenes rask med å kontakta eigaren. Det er litt dyrare enn lokala ho hadde, men Rivenes trur den sentrale plasseringa vil vega opp for det.

– Salongen vart litt gøymd. No håpar eg han vert meir synleg, seier Rivenes.

Ho håpar fleire skal svinga innom når dei går forbi. I salongen tilbyr ho farging og forming av augebryn, hudpleie, massasje og voksing. Ho vil fokusera meir på varesal. I butikken skal ho selja sminke og hudpleieprodukt.

Auka etterspurnad

No vert Rivenes tilgjengeleg i butikken i den faste opningstida. Ho har nesten 20 års erfaring i bransjen. Rivenes er frå Åsane, og arbeidde tidlegare i Bergen. Ho opplever at fleire reiser til terapeutar i Bergen for å få behandling.

– Eg synest det er kjekt å tilby dette lokalt. Folk sluttar ikkje å vera opptekne av seg sjølve, så eg trur det er eit behov her, seier ho.

Hudpleiaren opplever aukande etterspurnad. Det trur ho heng saman med at ho likar å snakka med kundane for å avdekkja behovet deira. Ho likar å gjera det vesle ekstra. Mellom anna serverer ho kaffi til dei som sit med beina i fotbad, eller legg inn ein liten massasje av hovudbotnen medan kunden ligg på benken for å fiksa vipper eller bryn.

– Viss kunden ønskjer å snakka, så gjer eg det òg. Nokre kan prata seg gjennom ein heil massasjetime, medan dei fleste berre vil liggja og slappa av, seier ho.

Sårbart åleine

Ho vert ikkje påverka av trendar, men ein gong i året reiser ho på kurs for å halda seg oppdatert på produkt og behandlingsmetodar. Likevel kjem ho ikkje til å utvida tilbodet no, sjølv om nokre har etterspurt manikyr.

– Det er fleire som utfører manikyr i bygda. Det har aldri vore mi favorittbehandling, seier ho.

Ansiktsbehandling er favoritten hennar. Då må ho leggja til rette for kvar enkelt kunde. Behandlinga er stort sett lik for alle, men ho må analysera kunden for å finna ut kva produkt som er dei rette å bruka.

Ho merkar at kundane er meir opptekne av at produkta skal vere naturlege. Ofte er det vaksne over 30 år som kjem til behandlingar. Dei fleste er mellom 40 og 60.

Travelt før jul

No er hudpleiaren inne i lågsesongen. Spesielt etter skulestart er det rolig. Utover hausten aukar etterspurnaden, og mot jul ventar ho å ha fullt opp.

Førebels er ho åleine i salongen. Ho har kjent på kor sårbart det er. Då ho vart skadd i ei ulukke, måtte ho stoppa drifta ein periode.

– Alt stoppar opp når ein er åleine. Då får ein heller ingenting inn, seier ho.

Det er ikkje økonomi til å tilsetja fleire i bedrifta, men ho utelukkar ikkje samarbeid med andre terapeutar.

– Eg har fleire rom her, så det er plass til fleire, seier Rivenes.