– Treng sårt renovering
Det ytre forfallet av Strandebarm Sportell har kome til eit punkt der noko må gjerast.
Det skriv kasserar i Strandebarm Idrettslag, Olav Sletvold i ein søknad til Kvam herad om 400.000 kroner i tilskot frå kraftfondet.
Særleg vindaugo er i dårleg stand, og veggene treng sårt til måling og stell. Det er eit stort og omfattande arbeid, som må fordelast over fleire år, skriv Sletvold.
Idrettslaget vil bidra med dugnad i alt målingsarbeidet, og så må ein leiga handverkarar til å skifta vindauga og reparera arka på taket, taket og takrenner.
Kostnadsoverslaget er på 1,34 millionar kroner over to år. Kasseraren reknar med ein eigenkapital på 200.000 kroner over to år, tilskot frå heradet på 400.000 kroner i år, 150.000 kroner frå Sparebankstiftinga Hardanger i år og 80.000 kroner frå Sparebanken Vest neste år. Det medrekna dugnadsarbeidet vil vera verdt 510.000 kroner over to år.
Arbeidet er planlagt starta i juli i år og avslutta sommaren 2024, skriv kasseraren.
Drifta av sportellet syner ei positiv utvikling. I 2021 gav drifta eit årsresultat på 743.000 kroner. Dette gjekk til dekking av akkumulert underskot frå tidlegare år. Særleg vart koronaåret tungt. Men stadig nye kundegrupper finn vegen til sportellet, og det er ei av dei største overnattingsverksemdene i Kvam, med 4.347 gjestedøger i 2022. Det nye sjøsportssenteret og minigolfbana har auka attraktiviteten til staden monaleg. Det er planar om å utvikla av tilboda med badestove, gapahuk og villmarkspark, opplyser Sletvold.
Den tidlegare husmorskulen i Strandebarm vart, etter å ha vore flyktningmottak frå 1999 til 2005, overteken av Strandebarm Idrettslag i 2008 og gjord om til overnattingsstad særleg for idrettsutøvarar. Det går fram av søknaden.
