Trendar påverkar polutsala
Vinmonopolet i Norheimsund selde mindre raudvin og meir øl i 2024 enn i 2023.
Butikksjef Britt Ingvild Djupevåg Torvik fortel at alkolfrie produkt hadde godt i sal i 2024. Også ein annan varekategori merkte seg ut som særleg populær hjå vinmonopola i Noreg.
«Lett og lyst»
Salstala 2024 syner ein oppgang for produkta i kategorien «lett og lyst», som rommar produkt med lågare sukker-, kalori- og alkoholinnhald: kvitvin, musserande, rosevin, øl og sider og alkoholfrie produkt.
– Folk vil ha lette og lyse produkt. Det kan vera på grunn av auka fokus på helse, seier Torvik.
Torvik påpeikar at den auka populariteten kan skuldast trendar i samfunnet.
– Trendane startar ofte i Oslo vest. Salet av raudvin og brunt brennevin minka, fortel Torvik.
Rekordsal
Dei norske polutsala hadde rekordhøgt sal av alkoholfrie produkt i 2024, med ein auke på 19 prosent. Det viser den nasjonale salsstatistikken.
Torvik fortel at utvalet av alkoholfrie produkt har vorte utvida på Vinmonopolet i Norheimsund, i takt med samfunns trendane. Butikksjefen har lagt merke til at alkoholfrie produkt er meir etterspurde.
– Veldig mange vel å ha gode alkoholfrie alternativ når dei skal ha besøk.
Den nasjonale salsstatistikken viser elles at sal av sider auka med 8 prosent i 2024. Aga Sideri hadde dei 2 mest selde sidrane hjå Vinmonopola i Noreg. På 1. plass kom «Humlepung Rosé», medan «Humlepung» kom på 2. plass.
Torvik fortel om god omsetning av sider hjå utsalet i Norheimsund. Ho meiner det er naturleg sidan utsalsstaden ligg i hjartet av siderproduksjonen i Hardanger.
– Det er ein eksplosjon av sider i heile landet, seier ho.
Torvik opplyser at utsalet i Norheimsund er mellom dei som har best utval av sidersortar: 47 sortar. 43 av dei er norske.
– Me har eit mål om å visa breidde i siderutvalet. Etterspurnaden er god, seier Torvik.
Slik var salet i Norheimsund
Avdelinga i Norheimsund hadde størst nedgang i sal av vin og brennevin i 2024. I vinkategorien minka salet av raudvin mest, med ein nedgang på 11 prosent. Salet av brennevin minka i alle variantar, med unntak av fruktbrennevin.
Det vart selt meir øl og sterkvin i 2024. Øl hadde ein oppgang på 14 prosent og sterkvin på 13 prosent.
To små varegrupper hadde størst utslag i statistikken, med høvesvis 47 prosent mindre sal av genever og 34 prosent meir sal av bitter.
