Tek til motmæle mot oppdrett i Mælen

Det ber grunneigar i Mælen og innehavar av Hardanger Kulturgalleri (HK), Arne Bakke Mælen, om i sitt innspel om søknaden.

Grunnen er at eit slikt anlegg vil uroa freden og roa i området, og at Hardangerfjorden allereie er under hardt press frå oppdrettsanlegg, skriv Mælen.

Det var tidlegare eit anna anlegg utanfor Mælen. Dette vart flytta.

— Lite ante eg at det nokon gong skulle koma på tale å etablera eit nytt anlegg her. Hadde eg visst at slike planar skulle koma, hadde nok galleriet ikkje vorte realisert. Dette er eit livsverk og har kosta meir enn dei fleste er klar over, skriv han.

Havforskingsinstituttet har teke til orde for færre oppdrettsanlegg på Vestlandet og auke i produksjonen på dei beste lokalitetane.

— Dette har gjeve motivasjon til å leggja nye planar. Eit oppdrettsanlegg vil stansa dei vidare planane og diverre svekkja ein motivasjon som har fått underteikna til å ha trua på framtida, skriv Mælen, som spør kvifor oppdrett skal gå på kostnad av andre næringar.

Fjordutsikta, stilla og den vakre naturen er mykje av hovudgrunnen til at reiselivet kan overleva, meiner han.

Mælen er i gang med å oppgradera kjøken, sengeplassar og sanitæranlegg. Han skriv at han har planar om eit nybygg for utleige.

— Alle gjestene kjem med same tilbakemelding: Ei ro og ei stille som er heilt unik, og eit fjordbasseng som heldigvis ikkje har forstyrrande element.