Syr tre tusen visir for dagen

Med ei ny spesialmaskin til kring 100.000 kroner kan dei produsera 180–200 visir i timen. Det kan koma endå større ordrar, ifølgje avdelingsleiar Lars Kristian Bu.

Det var Profil Emballasje AS (PE) i Vaksdal, som er heileigt av Hardanger Bestikk, som vann anbodet på visir frå Sjukehusinnkjøp HF/Helse Sør-Aust. PE kontakta NI, og hadde truleg hadde høyrt at verksemda lagt om til å sy smittevernfrakkar.

Arbeidet NI gjer, er å sy strikkar på visira for å halda dei på plass.

Viktig kompetanse

– PE har kompetansen til å laga sjølve visiret. Saumkompetansen og maskinene har me, seier Bu.

Han har fått i hus ei spesialmaskin, og har tinga ei til, for å effektivisera produksjonen ytterlegare.

PE kjem med lastebillass med visir og strikkar til Norheimsund, og NI produserer tre–fire tusen visir om dagen. Vanlegvis vert slik produksjon utført i utlandet, men dei siste månadene har det vore fokus på at norske produsentar kan levera smittevernutstyr.

– Eg er svært imponert over korleis medarbeidarane våre står på, seint og tidleg. Dei har vore villige til å ta på seg ein ny type jobb. Me har fått inn folk frå reiselivsnæringa som no jobbar for oss. Dei får betalt, det er ikkje det, men dei jobbar overtid nesten kvar dag. Alle har jobba lange dagar, så mykje dei kan, seier Bu.

– Stort prosjekt for oss

– Det er eit stort prosjekt for NI. Det varer til sommarferien og sikkert etter òg, seier Bu.

Å laga smittevernutstyr er eit nytt område for NI. Vanlegvis lagar bedrifta smelteverksklede, noko ho framleis gjer.

– Me har fått inn ekstra folk, så det er ikkje sagt at me ikkje skal laga smelteverksklede lenger. Dei kjem i tillegg.

NI har nyleg levert nær 4.000 smittevernfrakkar, og har hatt fem ekstrahjelper inne i samband med det. Verksemda har òg fått inn ekstra tilsette i det siste prosjektet.

Frakkane går både til tannlegar og helsevesenet. Dei er laga av eit antibakterielt stoff og toler vask på 95 grader. Stoffet har NI importert, fortel Bu.

Smittevernordre til Norhand