Synte fram kolleksjonane

To gonger kvart år plar Torpe Møbelfabrikk AS og fire andre møbelprodusentar syna fram nye modellar på ei bransjemesse i Polen. Eigentleg skulle det vera ei messe i april. Den vart avlyst på grunn av koronaviruset. Sidan koronaviruset framleis herjar, bestemde ein seg for å gjennomføra messa i Øystese. Dermed vart utsalslokalet til Torpe rydda og gjort om til messelokale.

Tore Torpe er dagleg leiar i Torpe Møbelfabrikk. Han fortel at messa er for butikkar som skal vurdera kva produkt dei ønskjer å tilby sine kundar.

– Representantar for butikkane vert inviterte til å koma. Dei får ei overnatting eller to på hotellet, dei får mat og så har me det koseleg saman og byggjer litt relasjonar, fortel han.

Messa vart arrangert frå måndag til fredag i førre veke. I løpet av veka var representantar for 27 norske møbelforretningar innom for å studera kolleksjonane.

– Alle var frå frie møbelforretningar, altså forretningar som ikkje ligg under ei kjede, fortel Torpe.

I tillegg til Torpe Møbelfabrikk stilte Top-line AS, Casø Furniture ApS, HC Tæpper AS og Livingbed ut møblar.

Familieverksemd

Torpe omtalar Torpe Møbelfabrikk som ei familieverksemd. Fabrikken vart starta av far hans i 1942. Torpe Møbelfabrikk var lenge mest kjent som salongbordprodusent, men dei siste åra har fabrikken utvida sortimentet til å innehalda matbord, stolar og skap.

Torpe Møbelfabrikk har i dag ni tilsette. Fabrikken slutta med treproduksjonen i 2009.

– I staden byrja me samarbeida med dyktige eikeleverandørar frå Ukraina og Polen. I dag kjøper me produkta ubehandla frå desse, og så lakkerer og fargelegg me produkta her i Øystese, fortel Torpe.

Møblane til Torpe vert framleis teikna i Øystese.

I tillegg til utsalet i Øystese opna Torpe for eit år sidan ein butikk på Husnes.

– Me sel framleis meir møblar i Øystese enn på Husnes, men etter kvart som butikken der vert meir kjend, trur eg den kan ta oss att når det gjeld omsetning, seier Torpe.

Møblar frå fabrikken vert òg selde i ei rekkje butikkar rundt om i landet.

– Ser positivt på framtida

I dag fortel Torpe at han ser lyst på framtida. Det har han ikkje alltid gjort.

– Tida etter at me la ned vår eigen treproduksjon var vanskeleg. Særleg var 2012 og 2013 tunge år. Tala var raude og me måtte gjennom ein skikkeleg hestekur. Hadde ikkje son min Hølje, sagt at han ønskte å ta over og halda fram å driva fabrikken, så trur eg Torpe Møbelfabrikk hadde vorte nedlagt. Heldigvis klarte me å snu den negative trenden, fortel han.

Også Torpe Møbelfabrikk har merka koronaviruset.

– Me kjøper alt i euro, og då viruset kom, svekte den norske krona seg med 30 prosent nesten over natta. Då sveitta eg. Mars var ein dårleg månad, men sidan har utviklinga vore veldig god. Når mange vel å bruka pengane på hus og heim i staden for til dømes reiser til utlandet, er det positivt for oss i møbelbransjen, seier Torpe.