Styttar båtsesong
Turistbåten kjem truleg ikkje til å koma på Hardangerfjorden før 21. juni i år.
Utval for samferdsle og mobilitet tilrådde samrøystes avkortinga av sesongen i møtet tysdag. Fylkesutvalet drøftar saka fredag 26. mars.
Saka vart så vidt drøfta i møtet i Hardangerrådet torsdag. Dagleg leiar Jostein Eitrheim meiner saka er eit prov på at Hardangerrådet er viktig og har ein funksjon, ettersom rådet ser ut til å få gjennomslag for ynsket om å tvinga Norled AS til å marknadsføra ruta til og med 29. august. Norled ynskte nemleg å avslutta sesongen 8. august.
— Set du 8. august som sluttdato, får du aldri vita om nokon var interesserte 10. august. Me får heller koma tilbake til det om sesongen vert veldig dårleg, sa Sigbjørn Framnes (Frp) som einaste talar i debatten i utvalet.
Vedtaket i utvalet inneber at sesongen kan avsluttast 16. august dersom det ikkje er grunnlag for vidare drift, men Norled må varsla dette minst to veker tidlegare. Selskapet planlegg å nytta ein båt med ein kapasitet på 112 passasjerar i år.
Bakgrunnen for den korte sesongen er koronaviruset. Også i fjor vart sesongen kortare enn vanleg. Kontrakten mellom fylkeskommunen og Norled tilseier at båten skal vera i drift frå 1. april til 31. oktober.
