Strandebarm på nett

Det heile starta då reiselivsentusiast og gründer Eva Berge las i avisa at nokon ville setja Strandebarm på kartet.

– Eg syntest det verka spanande, og lurte på om eg kunne bidra, fortel ho.

Berge kom i kontakt med Olav Sletvold og Helge Raknes, som står i bresjen for foreininga Strandebarm Utvikling. Etter eit telefonmøte vart dei einige om at Berge skulle laga ei nettside for Visit Strandebarm.

Samleside

Tanken var å samla lokale aktørar som har noko å tilby både fastbuande og turistar. Hovudkategoriane er overnatting, aktivitetar og mat.

– Ei slik nettside bidreg til at folk vert klar over kva som finst, seier Berge.

I skrivande stund er 19 aktørar representerte på nettsida. Berge håpar det kjem fleire etter kvart. Ho har hatt ansvar for å ta kontakt med aktørane og henta inn nødvendig informasjon.

– Det har teke litt meir tid enn eg hadde tenkt, fortel ho.

Berge har laga nettside til bedrifta og reisebloggen sin, så alt var ikkje heilt nytt for henne. Dette har uansett vore eit spanande prosjekt, fortel ho.

– Eg har lært utruleg mykje, seier Berge.

Ho har fokusert på den visuelle opplevinga av sida, i tillegg til at sida skal vera brukarvenleg.

Glad i bygda

Berge vaks opp i Strandebarm, men bur no på Gjøvik saman med mann og born. Likevel har ho framleis eit stort hjarta for heimstaden.

– Det er kjekt at «bygdingane» har tru på meg og involverer meg i prosjektet, seier ho.

Berge tykkjer det er kjekt med sosiale medium, og bedrifta hennar, «Eg Ser Deg», hjelper ulike aktørar med å vera synlege på nett. Berge har vore gründer i eitt år og har hatt mange varierte oppdrag.

– Ein har aldri heilt ferie som gründer, men ein kan styra kvardagen meir sjølv, fortel ho.

Berge elskar å reisa, så det passar fint at ho kan ta jobben med seg overalt. Ho set stor pris på fridomen.

– Det er viktig med litt action i kvardagen. Ein lever berre ein gong, seier Berge.