Strålande også for skisenter

Sola skein for det meste frå klar himmel heile påskeveka, så nær som dei to påskedagane. Båe skisentera melder om godt besøk.

I Eikedalen vart ei våt nyvinning populær. Ved Hardangerløypa laga skisenteret til eit vassbasseng som folk kunne skri over. Alt frå femåringar til folk i 70-åra tok sjansen. Skisenteret lovar gjentaking neste år.

– Nokre bruka nokre dagar før de torde, medan andre berre gav full gass. Ikkje alle klara å halda skituppane over vasskorpa, og dimed enda det med bad, opplyser skisenteret i ei pressemelding.

Bassenget vart halde under oppsyn av både Raudekrossen og ei badevakt frå skisenteret.

Skisenteret skipa til påskerenn langs Tobiasheisen i barneområdet påskeaftan. Kring hundre born deltok og fekk påskeegg for innsatsen.

Båe skisentera vurderer å tyna sesongen litt til og ha ope ei helg eller to til. Komande veke er det meldt regn. Skisentera har hatt strålande tilhøve i både vinter- og påskeferien.