— Sterkt aukande reiselyst

Måndag var verdas turismedag, og i samband med det gjekk Google ut med kva destinasjonar som var mest søkt på i Google Maps i 2021. På topp ti ligg både Steinsdalsfossen og Vøringsfossen. Det gler reiselivsdirektøren i Visit Hardangerfjord AS, Andreas Skogseth.

— Dette har mykje å seia for regionen. Steinsdalsfossen har vorte ein veldig kjend attraksjon, og nordmenn har verkeleg byrja å få auga opp for han. Både Steinsdalsfossen og Vøringsfossen er lett tilgjengelege og tilrettelagde, seier Skogseth.

Skogseth skryter av lokale krefter som er flinke til å promotera det me har rundt oss.

— Og så trur eg både Vøringsfossen og Steinsdalsfossen har vel så høge besøkstal som dei som ligg øvst på lista, til dømes Nordkapp, seier Skogseth.

— Ein turistmagnet

Børge Nordlinder Nitter er dagleg leiar i Nitter Nordlinder AS, som driv turistinformasjonen ved Steinsdalsfossen. Han fortel at det totalt sett har vore færre besøkjande i år samanlikna med 2020, men at september ser ut til å bli ein bra månad.

— I 2020 var det kring 3.500 besøkjande i september. I år har me passert 6.000, og har to dagar att, seier Nitter.

Han trur det handlar om at cruisebåtane har kome tilbake til Bergen, og at turistbussane kjem innover til fjorden.

— Det betyr at Steinsdalsfossen er ein turistmagnet for heile Kvam. Eg sender ofte folk vidare til bygdene og til aktivitetane rundt her. Mange veit ikkje om alt som er råd å finna på, men køyrer forbi, seier Nitter.

— Gledeleg

Skogseth i Visit Hardangerfjord seier at mange reiselivsbedrifter har meldt om god pågang frå utanlandske gjestar den siste månaden. Normalt sett vil fleire verksemder roa ned drifta på hausten, og mange har vore nøydde å omstilla seg.

— Visit Hardanger passerte fjorårets besøkstal på heimesida tidleg i september. Eg ser ei sterkt aukande reiselyst, seier Skogseth

Han gler seg over at begge turistdestinasjonane på lista frå Vestland ligg i Hardanger.

— Hardanger er populært, konstaterer han.