Søkjer pengar til snøggkompost
Firmaet Lokal bokashi AS på Omastrand satsar på ein ny type avfallskompostering.
Føretaket har søkt om 30.000 kroner frå kraftfondet til Kvam herad.
Prosjektleiar Fredrik Haugerud skriv at bokashi – eit japansk omgrep – vil vera interessant for hageinteresserte privatpersonar og institusjonar som skular og barnehagar.
Firmaet har utvikla sitt eige bokashistrø med bakteriar og gjærsopp som fermenterer matavfall effektivt. Eit anna prosjekt går ut på å laga høgkonsentrert gjødsel av tang.
Med bokashistrø rotnar ikkje avfallet, men vert brote ned med hjelp av mikroorganismar i lufttette behaldarar. Det gjev svært næringsrik jord og luktar ikkje så vondt som vanleg kompost, og nedbrytinga går raskare.
Pengane skal gå til marknadsføring og produktutvikling, og Haugerud vil òg søkja kraftfondet om 15.000 kroner neste år og 5.000 kroner i 2022. Firmaet treng mest pengar i starten, skriv Haugerud.
Fredrik Haugerud har ein master i matvitskap frå NMBU. Røynsler frå studiet hans har gjort det mogleg å utvikla gode retningsliner under produksjon og kvalitetssikring av produkt som har med mikroorganismar og fermentering å gjera.
– Det er viktig å forstå korleis mikrolivet «jobbar» i slike prosessar for å sikra eit velfungerande produkt som held seg lenge, skriv den daglege leiaren i søknaden.
Øystein Haugerud er sivilagronom med ein master frå NMBU og har stor kompetanse når det gjeld jordbruk, gardsdrift og generelt om jordsmonn og dyrking. Han har drive ei rekke prosjekt om jordhelse og jordbruk og har halde ei rekkje føredrag med rettleiing til bønder. Han har kunnskap om jord, dyrking, gjødsel, økologi og mikroliv.
Hagebrukar Jannicke Grønning syter for innhald i sosiale medium.
Til marknadsføring nyttar verksemda Google-tenester.
