Cato Kjøsnes sel alt frå små stjerneskot til store rakettbatteri i den lett synlege «kiosken» på Tolo.

Snart smell det

2024 nærmar seg med stormskritt, og fyrverkerisalet er i gang.

Journalist
Publisert

– Nokon meiner at fyrverkeri er positivt, andre tykkjer det er negativt, seier Cato Kjøsnes.

Sjølv er han glad i både smell og lys. Favoritten er dei store rakettane som går høgt og gjev mykje lys.

I sju år

Fredag rigga Kjøsnes opp salsbua si utanfor Rema 1000. Der har han stått siste delen av romjula i sju år. Dei som stod før han, pendla frå Bergen. Kjøsnes fortel at det vart litt kav, så han sa seg villig til å hjelpa med salet i Norheimsund eitt år.

– Det var kjekt, så eg fortsette, seier han.

I starten nytta han eit telt som butikk. Deretter gjekk Kjøsnes til innkjøp av vogna han brukar i dag.

– Tak og varme gjer godt, fortel han.

Cato Kjøsnes syter for at dei som likar å markera årsskiftet med lys og lyd, får gjort det.

Då han starta fyrverkerisalet i 2016, gjekk forretninga litt tregt. Sidan har det teke seg jamt opp. Ifølgje Kjøsnes held salstala seg ganske stabile, sjølv om dei varierer litt med vêret.

– Mange av dei same kundane er innom kvart år, seier han.

Reglar for kjøp og bruk av fyrverkeri

• Handtering av eksplosive varer er forbodne, bortsett frå på nyttårsaftan.

• Du må vera over 18 år for å kjøpa og nytta fyrverkeri, og har ikkje lov til å gje fyrverkeri til nokon som er under 18 år.

• Rakettar med styrepinne vart forbodne i 2009 på grunn av mange ulukker og augeskadar.

• Du har lov til å skyta opp fyrverkeri nyttårsaftan mellom klokka 18 og 02, men berre på stader der det ikkje er til fare for liv, helse, miljø og materielle verdiar. Du skal ha tilgang på sløkkjeutstyr i nærleiken.

• Bryt du reglane, kan du straffast med bot eller fengsel i inntil tre månader.

Kjelde: lovdata.no

Venta litt lenger

Kjøsnes ynskjer ikkje at folk skal skyta opp rakettar for tidleg. Han har løyve til å selja fyrverkeri frå og med 27. desember, men valde å utsetja det i to dagar. Det same gjorde Svea Fyrverkerier, som har ei anna sals bu i Norheimsund.

– Me vil ikkje ha klagar på at folk skyt opp rakettar midt i romjula, seier Kjøsnes.

Han trur ikkje det kjem færre kundar i år, trass prisauke på dei fleste varer her til lands. I bua til Kjøsnes har nemleg prisane gått ned.

– Det har allereie vore kundar innom, så det skal nok gå bra, seier han.

Skal du noko spesielt på nyttårsaftan? Tips gjerne HF i Tipps-appen eller i e-post til redaksjon@hf.no.

næringsliv fritid
Laga med Labrador CMS