Slår seg opp i smal og usexy bransje

Arild Soldal frå Soldal er dagleg leiar i Cubit og ein av dei fire gründerane bak verksemda. Cubit har ni tilsette og har sidan oktober i 2019 halde til i eit lite kontor i eit stort bygg på Nesttun.

Soldal fortel at Cubit leverer ei internettbasert teneste som kundane brukar til å planleggja og gjennomføra tilsyn.

– Tidlegare var det gjerne slik at ein gjennomførte tilsyna frå måndag til torsdag, og så skreiv ein tilsynsrapportane på fredagen. Når fredagen kom, sat ein gjerne med haugevis med papir som ein måtte rota seg gjennom når rapportane skulle skrivast. Våre dataprogram fjernar dette problemet. No gjer ein alt digitalt på sjølve tilsynet. Rapporten er klar før ein går, forklarar Soldal.

Løysinga til Cubit vert brukt på el-tilsyn og branntilsyn. Verksemda vurderer også å utvida bruksområdet til å gjelda andre typar tilsyn.

Lang veg å gå

I studietida var det ikkje opplagt at Soldal skulle verta IT-gründer. Han har studert faget International Relations ved eit universitet i Perth i Australia og samanliknande politikk ved Universitetet i Bergen. Han har dessutan ei mastergrad i miljø- og ressursstudium.

Medan han tok mastergraden, byrja han jobba på kundesenteret i det som no heiter Sbanken. Han har sidan arbeidd som miljø- og ressursrådgjevar i Fjordkraft AS, før han vart prosjektleiar i IT-avdelinga til verksemda.

Frå Fjordkraft gjekk turen vidare til IT-konsulentverksemda Miles AS. I 2014 vart han leigd ut til Hafslund AS for å hjelpa verksemda med å setja opp ei el-tilsynsløysing. Dette vart indirekte årsaka til at Cubit såg dagens lys.

– Løysinga me skulle setja opp, fungerte ikkje som ho skulle. Difor føreslo me å laga ei heilt ny tilsynsløysing. Arbeidet vart gjort av oss fire som grunnla Cubit. I mai 2017 vart Cubit spunne ut frå Miles, og me fekk ta med oss koden, fortel Soldal.

Hafslund byrja bruka løysinga til Cubit til el-tilsyn i 2018. I 2019 samarbeidde Cubit med Bergen kommune om å laga ei liknande løysing for branntilsyn.

– Ganske kort tid etter dette signerte me med Oslo kommune og Rana kommune, og me held for tida på å signera ein avtale med Kvinnherad kommune, fortel Soldal.

Vil veksa ut av landet

For mange verksemder i startfasen er utgiftene langt høgare enn inntektene. Slik er det ikkje for Cubit.

– Frå 2018 til 2019 tredobla me nesten omsetninga. Det kjem me truleg til å gjera i år òg. Moglegheitene er gode for at rekneskapen i år går i null. Me har ei veldig solid ordrebok. Faktisk er det slik at me nesten har for mange som ønskjer å verta kundar. Dette gjer oss til eit interessant investeringsobjekt. Planen er at me i haust skal ut og henta pengar. Me er i den heldige situasjonen at me kan bruka pengane til å veksa, ikkje til å overleva, fortel Soldal.

Cubit har for lengst byrja sjå utover dei norske landegrensene.

– Me byrjar truleg i Norden, men me har òg andre marknader me ser på.

Ketchup-effekten

Tidene har ikkje alltid vore like gode.

– Det gjekk greitt å selja dei to første lisensane. Etter det kom det ein periode på om lag åtte månader utan eit einaste sal. Det var ei vanskeleg tid for alle. Frå slutten av 2019 kom det heldigvis ein «ketchup-effekt».

Soldal trur ei av årsakene til at verksemda gjer det så bra, er at ho er i ein «smal og usexy» bransje med få konkurrentar.

– Samstundes vert både verksemder og kommunar stadig meir digitaliserte. Det finst mange døme på kostbare og feilslåtte digitaliseringsprosjekt. Me er smidige og enkle å ha med å gjera. Dessutan er me flinke teknologar som lagar gode løysingar, seier Soldal.

– Treng stort ego

Soldal trur det hjelper å ha eit solid ego dersom ein skal verta gründer.

– Ein må ha stort nok ego til at ein føler seg trygg på at ein skal få det til. Ein må vera risikovillig og ha eit ønske om å starta noko ein har stor tru på. Me som starta Cubit, har jobba mange stader. Eg trur me alle hadde eit ønske om å ta det beste frå alle desse stadene og laga ei verksemd som er slik me vil at den skal vera. Hadde målet berre vore å tena pengar, hadde me nok gjort noko anna, fortel Soldal.

Hardt arbeid kjem ein ikkje utanom dersom ein vil starta ei verksemd.

– I år hadde me sommarferie for første gong sidan oppstarten. Likevel hadde me ikkje gjort dette dersom me tykte det var eit slit. Me gjer det fordi det er kjekt.

Soldal seier at han har hatt lite bruk for studia i arbeidet med å byggja opp Cubit.

– Det måtte eventuelt vera fordi samanliknande politikk er godt å ha når ein skal driva med smalltalk. Smalltalk vert det ein del av. Ein treffer mange rare personar, fortel han.