— Skarpen må gravast ut
Kokegroper, stolpehol, eldstader og dyrkingshorisontar har dukka opp.
Vestland fylkeskommune og Universitetsmuseet i Bergen godkjenner bygging av næringsområdet på Skarpen på nokre vilkår. Det er nemleg funne automatisk freda fornminne sør for fylkesveg 79.
Fornminneseksjonen ved Universitetsmuseet i Bergen tilrår at det vert gjeve dispensasjon frå lov om kulturminne med vilkår om at det fyrst vert gjennomført arkeologiske utgravingar.
Vedtak om omfanget av den arkeologiske granskinga kan fyrst skje etter at reguleringsplanen er endeleg vedteken. Ei arkeologisk utgraving lèt seg normalt berre gjennomføra i sommarhalvåret.
Tiltakshavar må varsla Vestland fylkeskommune i god tid før han ynskjer å gjennomføra tiltak etter reguleringsplanen. Riksantikvaren vil deretter gjera vedtak om omfanget av den arkeologiske granskinga.
Sett saman med resultata frå tidlegare undersøkingar av Mikkjelsflaten og Øvre Øystese vil ein gjennom utgravingar på Skarpen kunna få ei djupare forståing av samfunnsorganiseringa i Øystese og denne delen av Hardanger i slutten av eldre jernalder, påpeikar museet.
Det er påvist dyrkingsflater daterte til eldre bronsealder, førromersk jernalder og vikingtida.
Universitetsmuseet i Bergen opplyser at det i undersøkingar på Skarpen vart funne kokegroper som er daterte til yngre romartid eller folkevandringstida.
I planområdet er det òg registrert stolpehol, eldstader og dyrkingshorisontar – restar etter dyrking. Desse er dokumenterte og automatisk freda.
Næringsområdet har òg nokre bygningar på nordsida av vegen som er såkalla Sefrak-registrerte.
Desse har i utgangspunktet ikkje spesielle restriksjonar, men kommunen bør vurdera verneverdien før det eventuelt vert gjeve løyve til å endra, flytta eller riva bygningar, ifylgje Riksantikvaren.
Fylkeskommunen meiner at bygningsmiljøet ikkje har regionale kulturminneverdiar.
Planforslaget legg ikkje opp til store endringar i tunet, men Vestland fylkeskommune ber om at husa vert tekne omsyn til. Fylket ber elles om at nær- og fjernverknader av tiltaket må utgreiast, då planområdet ligg i eit kulturlandskap ved fjorden.
