Sidergull til Spildegarden
Eplesideren Spilde Sider Aroma frå Spildegarden var ein av fleire eplesidrar frå Hardanger som hausta medaljar i den internasjonale sidertevlinga Cider World 2020.
Tevlinga gjekk av stabelen i Frankfurt am Main fredag kveld. Sideren frå Spildegarden tevla i kategorien for musserande sider. Sidrane vart vurderte av ein jury som delte ut poeng. Sidrar som får frå 120 til 109 poeng, får gullmedalje. Sider som får frå 108 til 97 poeng, får sølvmedalje, medan sider som får frå 96 til 80 poeng, får heiderleg omtale.
Sideren frå Spildegarden fekk 114 poeng. Det var den nest høgaste poengsummen i klassen. Høgaste sum gjekk til Sølvsider frå Apal Sideri frå Sæbø i Ryfylket.
Siderverdsmeisterskap
Dagleg leiar i Spildegarden, Geir Henning Spilde, fortel at Cider World er ei viktig for siderprodusentar.
– Det er ei tevling med deltakarar frå mange land, og eg likar å tenkja på det som ein verdsmeisterskap i siderproduksjon, fortel han.
Det er første gong garden har levert eit produkt til tevlinga. At det gode resultatet vil føra til at ein snart finn sider frå Spildegarden på restaurantbord i heile Europa, tvilar Spilde på.
– Me er ein liten aktør som først og fremst siktar oss inn mot den lokale marknaden, men me ser at resultatet har vorte lagt merke til. Fleire som vitjar gardsbutikken, spør etter Spilde Sider Aroma, fortel han.
– Sette Noreg på kartet
Sideren frå Øystese var berre ein av mange norske sidrar som gjorde det godt i år.
– Årets tevling var verkeleg med på å setja Noreg på siderkartet, seier Spilde.
Også to produsentar frå Ullensvang utmerka seg i tevlinga. Åkre gard fekk gull i klassen is-sider for Edel Is-Sider og sølv i klassen for musserande sider for sideren Edel Cuvée Park. Store Naa Siderkompani fekk sølvmedalje i same klasse med sideren 57/2.
