Ribbar fekk pålegg
To ribboperatørar i Kvam fekk påpakning frå Sjøfartsdirektoratet.
I slutten av juni fekk Hardangerfjord Adventure AS pålegg om å utbetra tre manglar ved ribben «Samlafjord». Dette er båten selskapet har hatt sidan det starta drifta i 2019. Mellom anna skal båten ha mangla magnetkompass. Dette er eit krav for å kunna gå i trafikk med passasjerar. Båten måtte dessutan utstyrast med papirkart, av di det ikkje kunne dokumenterast at kartplottaren om bord var basert på kart frå Kartverket. I tillegg gav sjøstyresmakta pålegg om å skaffa tre fallskjermlys og tre handbluss.
Også Norheimsund Hamneutvikling sin «Norheimsund RIB 1» fekk ei liste over ting som ikkje var i orden. Til liks med «Samlafjord» mangla papirkart om bord. Også tryggleiksstyringssystemet mangla. Dette måtte på plass og sendast til Sjøfartsdirektoratet. Verksemda hadde heller ikkje registrert seg for å driva med ribbverksemd, noko som må gjerast kvart år.
Kort tid etter at pålegga kom, var alle feil utbetra på begge båtar, syner dokumenta frå Sjøfartsdirektoratet.
