Planane i Herand blei stoppa. No vil oppdrettaren lenger inn i fjorden.

I november kom den endelege avgjerda om at lakseoppdrettarane i Eide Fjordbruk ikkje får etablera eit nytt anlegg i akvakulturområdet ved Mælen i Herand.

Les også:

Mattilsynet meinte at anlegget ville koma for nær setjefiskanlegget til Mowi, noko som ville utgjera ein for stor risiko for sjukdomssmitte for fisken.

Mattilsynet brukte i underkant av tre år på å avgjera klagesaka. Det er ikkje uvanleg, seier Vidar Hjartnes, samfunnskontakt i Eide Fjordbruk.

– Me er vane til at det tar tid. Akvakultursaker gjer alltid det, seier han.

Vil lenger inn i fjorden

Om oppdrettsselskapet kjem til å søka om å få legge eit anlegg ein annan stad, er usikkert.

I dag finst det ikkje oppdrettsanlegg lenger inn i Hardangerfjorden enn Tveitnes, mellom Ytre Ålvik og Ålvik. Men fleire oppdrettarar, blant anna Eide Fjordbruk, ønsker å setta av nye område til oppdrett i den nye arealplanen, som Ullensvang kommune har jobba i fleire år med.

– Men kvar den planen står i dag, veit eg ikkje. Det må du spørja kommunen om, seier Hjartnes.

HF har ikkje lukkast med å få svar frå kommunen på spørsmålet om kvar forslaga til oppdrettsselskapa står i dag, men i fjor opna styringsgruppa for kommuneplanen for å sjå vidare på dei. Planframlegget er enno ikkje kome til politisk handsaming i kommunestyret.

Semilukka

Det var eit såkalla semilukka anlegg Eide Fjordbruk ville plassera ved Mælen. I slike anlegg vert slammet, altså fiskefôr og avføring, fanga opp. I tillegg skal det ikkje koma lus inn i anlegget, fordi vatnet blir henta på djupare vatn, der lusa ikkje lever.

Det betyr ikkje at anlegga er utsleppsfrie. Avfallsstoff som fosfor og nitrogen vil framleis bli sleppte ut i fjorden.

Hjartnes og Eide Fjordbruk meiner likevel at desse anlegga er framtida for Hardangerfjorden.

– Me driv med semilukka anlegg ved Varaldsøy, med godt resultat. Det har ikkje vore lus i merdane, seier han.