Mogleg gjennombrot for hydrogenframstilling
Ein kvemming er sentral i eit forskingsprosjekt for å produsera hydrogen og samstundes fanga karbondioksid (CO₂), skriv Teknisk Ukeblad.
Arnstein Norheim frå Norheimsund er teknologidirektør i selskapet ZEG Power AS, lokalisert på Fornebu. Selskapet er ein teknologiutviklar og leverandør av anlegg for produksjon av hydrogen frå naturgass eller biogass med integrert CO₂-fangst. No driv selskapet og realiserer det fyrste kommersielt relevante produksjonsanlegget saman med Coast Center Base AS (CCB) på Kollsnes.
Norheim var nyleg på framsida av Teknisk Ukeblad med nyvinninga.
Det moglege gjennombrotet er eit resultat av 20 års forsking og utvikling ved Institutt for energiteknikk (Ife). ZEG Power vart oppretta i 2008.
– Når ein kan produsera hydrogen av ein fossil ressurs og samstundes redusera utsleppet av klimagassar, vil dette vera ei løysing for å redusera global oppvarming, skriv Teknisk Ukeblad.
ZEG Power og CCB har fått 77 millionar kroner frå Enova til realisering av eit første pilotanlegg på Kollsnes i Øygarden. Investorar frå mellom anna Japan og England har saman med dei norske eigarane i selskapet bidrege med 130 nye millionar kroner til vidare satsing.
Arnstein Norheim var involvert i prototypeanlegget på Kjeller i 2013–2014, før han gjekk til Norsk Energi og seinare Quantafuel som teknologidirektør. Han har ein master i fornybar energi frå Noregs miljø- og biovitskaplege universitet og Danmarks Tekniske Universitet, og doktorgrad i forbrenningsteknikk frå NTNU.
– Eg kom attende fordi eg er trygg på denne teknologien, og fordi eg trur han har eit stort potensial i energisystema i framtida. No skal me skalera teknologien vidare til fyrste produkt i kommersielt relevant storleik ved å byggja eit anlegg på Kollsnes som har 30 gonger større kapasitet enn det eksisterande testanlegget, seier Norheim til Teknisk Ukeblad.
Saman med CCB er det planlagt å skalera vidare til eit neste anlegg med kapasitet til å produsera 600 kilo hydrogen i timen.
Norheim forklarar kva som er nytt ved Zeg Power sin metode.
– Hydrogen blir i dag i all hovudsak produsert ved reformering. Elektrolyse er heilt marginalt globalt. Såkalla Steam Methane Reforming (SMR) kan produsera grå hydrogen, med CO₂-utslepp knytt til produksjonen, eller blå hydrogen ved å kopla på separat CO₂-fangstanlegg. Vår teknologi heiter SER, Sorption Enhanced Reforming, og er ei vidareutvikling av SMR. Denne vidareutviklinga tyder meir kompakt teknologi, færre prosesstrinn og altså integrert, ikkje påhengd, CO₂-separasjon, skriv Norheim til HF.
