Måtte hatt 15 toalett
Underentreprenøren Allbygg AS fekk ikkje dispensasjon frå smittevernreglane for arbeidet på nybygget på Stronde i Øystese. Det ordna seg likevel.
Verksemda har 15 fast tilsette polske arbeidarar som skal arbeida på bustadprosjektet til Lab Entreprenør AS. Det opplyser anleggsleiar i Lab, Jens Nordtveit.
For å få dispensasjon frå kommuneoverlegen, måtte dei hatt eitt toalett, dusj og ein garderobe til kvar arbeidar. Det måtte dessutan ha vore bustadrigg på sjølve byggjeplassen. Alt arbeid måtte også gå føre seg under tometersregelen. No har arbeidarane i staden sete i karantene i egne leilegheiter i 14 dagar på Tysse, og kjem på jobb att 29. april.
Lab har i mellomtida hatt innleigde folk frå lokale entreprenørar heilt sidan restriksjonane tredde i kraft.
– Me er ferdige med veggene i fyrste etasje og er godt i gang med betongarbeidet. Det er berre betongarbeidarar hos oss no. Det har vore andre fag innom, men me hadde lagt om framdriftsplanen slik at det berre hadde vore Allbygg til stades viss me hadde fått dispensasjon, seier Nordtveit.
