Maskin lagar veg i vellinga
Jarle Måge i J. Måge Kratt & Beite Rydding i Tørvikbygd har søkt kraftfondet i Kvam herad om 40.000 kroner i år og 20.000 kroner neste år.
Pengane skal gå til kurs, opplæring og marknadsføring i verksemda. Måge har kjøpt ei fjernstyrt, beltegåande maskin utstyrt med krattknusar og beitepussar.
I ein freistnad på å nå ut til fleire kundar krevst meir marknadsføring i aviser og magasin. Måge vil utvikla firmaet med fleire tenester ved bruk av andre reiskapar til maskina, til dømes ein stubbefres og ein såkalla steinbegravar. Verksemda siktar seg inn mot plen- og hageopparbeiding hjå private kundar, men også gardbrukarar, entreprenørar og skisenter.
Til no har maskina vore brukt i 240 timar. Ho har vist seg effektiv og flisar opp kratt i inntil 20 centimeter i diameter. Maskina set lite spor etter seg.
Summen av finansieringa er på 55.000 kroner i år og 25.000 kroner neste år.
Måge er utdanna landbruksmekanikar og har arbeidd med skogbruk tidlegare. Han arbeider for tida i Nordsjøen, men vonar å skapa seg eigen arbeidsplass, eventuelt med kollegaer.
