Hotellsesong på jamnen
Dei lokale hotella merkar ikkje nokon turistboom.
– Me er på fjorårsnivået, seier Tina Våtvik Olsen.
Ho er driftsdirektør i Fjordtind Hotels. Det er tala for hotellet deira i Øystese ho refererer til. Hotellet er det einaste av dei tre i kjeda som er ope heile året. I år var våren god, med mange kurs og konferansar. Sommaren, derimot, har vore svakare enn venta.
– Med tanke på kor populært Hardanger er, så er det litt rart, seier Olsen.
Ho seier at hotellet ikkje har satsa så tungt på turistbussar som før oppussinga av hotellet, og heller retta seg meir mot dei individuelle gjestene.
Kostnadsauke
Noko Olsen har merka, er at det i å, er ein større del utanlandske turistar enn i fjor. Noko av grunnen kan vera den svake krona. Ho gjer det dyrare også for nordmenn å ta inn på hotell.
– Me har merka prisveksten godt, seier driftsdirektøren.
Mellom anna maten har prisen på mat auka etter at leverandørane sette opp sine prisar. Dette er ikkje gunstig for dei norske gjestene.
Ein ting Olsen trekkjer fram, er samarbeidet som med Hardangerbadet. Med det dårlege verdt i juli har det vore positivt for båe partar.
– Folk trur det er hotellet sitt basseng. Så saumlaust vil me ha det, seier ho.
Drift heile dagen
Også i grannebygda har mange vore innom hotellet i sommar. Hotelldirektør Marie Skutlaberg Kjøsnes på Thon Hotel Sandven seier sesongen har vore som venta.
– Juni var litt betre enn juli, seier ho.
Også i Norheimsund er det fleire utanlandske turistar enn norske.
– Nordmenn reiser stort sett etter vêret, seier Kjøsnes.
Ei gruppe som har nytta hotellet mykje i år, er lunsjgjester. Det kan koma frå éin til fem turistbussar med cruiseturistar frå Bergen innom dagleg.
– Det er viktig å få fordelt gjestene litt ut over dagen, seier hotellsjefen.
Så langt ser august ut til å verta ein god månad for hotellet, opplyser ho.
Nesten fullt
Skal ein sjekka inn på hotell i Jondal, er Hardanger House i Vik det einaste opne alternativet i sommar. Hotelldirektør Oda Amalie Løberg Grimstad seier hotellet har hatt fullt hus nesten heile sommaren.
– Det har gått veldig fint så langt, seier ho.
Hotellet i Jondal får eit fleirtal av gjestene frå Noreg, men Grimstad merkar at fleire og fleire legg merke til det nyaste tilskotet på overnattingsfronten i nasjonalparklandsbyen.
Sjølv om hotellet har vore nærast fullt heile sesongen, seier direktøren at det ligg litt under fjoråret.
– Me ligg på 2021-nivå, seier Grimstad.
Hotellet, som opna dørene i 2019, har ni dobbeltrom. Det er såleis det minste hotellet i området.
