Hotellet i Jondal er sett på pause

Det nye hotellet i Jondal, Hardanger House, spara ikkje på noko når det gjaldt kvalitet på innreiing, mat og vin. No blør det på grunn av koronapandemien, seier eigar Conrad Hansen.

Hotellet starta drifta i september og stengde i byrjinga av mars. Førebels er det stengt ut april.

– Me har ikkje avgjort om me skal halda stengt ut mai, seier Hansen i eigarselskapet Acos Invest AS.

– Eg trur det vert til at me ventar litt og ser og ser kva retning situasjonen tek etter påske. Me må fylgja med på kva det offentlege bestemmer seg for. Me tek det ikkje så vidløftig. Me tek ein dag om gongen. Her i Jondal er det ikkje så mange koronasmitta, seier Hansen.

– Skulle ta av

Før krisa var det ein god del gjester ved hotellet. Det var ikkje folk heile tida, for det er i ein oppstartsfase. Men Hansen tenkte verksemda skulle få det til å ta av i sommar. Så tidleg vert det truleg ikkje noko av.

Hotellet har hatt mange samlingar med mykje god mat og god vin. Mange utanlandske vinkjennarar presenterte vinar. Og så har hotellet avvikla ein god del møte og hatt helgekurs.

– Eg veit ikkje kor stor omsetnaden var, men me tente vel ein million eller to, seier Hansen.

Nytta lokal arbeidskraft

Hotellet nytta ISS til ulike tenester som vasking og rydding av rom. Tre ISS-arbeidarar måtte seiast opp, bortsett frå ein jondøling som vaskar fellesområda to gonger i veka.

Hotellsjef Inge Selje er fast tilsett, og så hadde ein to servitørar på oppdrag når det var gjester. Nokon fast kokk rakk dei ikkje å tilsetja før det sa stopp. Hotellet leigde inn mellom andre Kokken Arthur og Espen Raknes frå Eikeneset herregaard i Strandebarm. Selje har òg nytta Günter og Kerstin Schmaus, dei tidlegare eigarane av Jondal Hotel, som har starta Jondal Matkanten & Catering.

– Kokkane me har leigt inn, har vore svært flinke. Sørvisfolka frå ISS har vore flinke òg. Men dei kan me altså ikkje bruka no, seier Hansen.

– Sårbar bransje

Hansen seier hotellet kan halda ut koronakrisa nokre år, om det trengst, men han tapar mykje pengar. Dei pengane ein no skulle tent inn for å betala tilbake gjeld og investeringar, kjem ikkje enno.

– Me er i den bransjen som sikkert tapar mest på pandemien, seier eigaren.

Mange store grupper hadde tinga plass. I mai var det planlagt konfirmasjonar, åremålsdagar og andre tilstellingar. Også i juni var det tinga plass ved hotellet. Alle tingingane er kansellerte.

– Me tek det med ro og stressar ikkje, men det er klart me blør, seier Hansen.

– Det er ikkje ein hyggeleg situasjon. Me får inderleg vona at det vert normale år seinare, seier eigaren .

– Godt mottekne

Hotellet bidreg med noko nytt i bygda. Under mat- og vinsamkomene har det vore heilt fullt, stort sett med jondølingar som gjester.

– Jondal har teke svært godt mot oss. Det er positivt. Eg trur me kan få eit godt samarbeid vidare framover med ullensvangarane, seier Selje.

Han seier hotellet hadde hatt nok kundar om det ikkje var for koronapandemien.

– No må me sjå det an, seier han.

Er ikkje under press

Selje trur ikkje det beinveges er problem for hotelldrifta, i og med at hotellet er privat eigt. Det er Acos Invest som avgjer om det vil driva vidare.

– Me vil opna igjen så snart me får høve til det, seier Selje.

Han seier det er litt tidleg å seia noko om kva erfaringar han har gjort seg med drifta av hotellet. Det har hatt ein del kundar, men kunne gjerne hatt fleire for å driva økonomisk. Hotellet har ikkje gått i pluss enno.

Driftsselskapet har lånt pengar frå morselskapet, Acos Invest. Førebels går det greitt. Det er ikkje noko banklån å betena. Hansen har tidlegare fortalt at hotellet er finansiert med pengar frå aksjesal.

– Det er medrekna at me ikkje går i pluss dei fyrste åra. Me har ikkje noko stort press på oss, seier Selje, som bur i Fyllingsdalen og vekependlar til Jondal.