Har opna ny velværesalong i Grova
Jeanette Rivenes opna ny hudpleiesalong i Norheimsund 4. mai. No håpar ho det kan bli ein trygg og god arbeidsplass.
Etter ein gruppetime på treningssenteret Attrå i Norheimsund spurde Rivenes, litt på spøk, om ikkje senteret hadde plass til ein liten hudpleiesalong i lokala. Dagleg leiar Hildegunn Berge var klar med ein gong.
— Etter den timen skjedde alt ganske fort. Kring to månader seinare opna salongen, seier Rivenes.
Lang erfaring
Rivenes er frå Bergen og er utdanna hudterapeut. Ho har arbeidd i faget i 15 år, og trivst godt i yrket. At salongen hamna på eit treningssenter, er ikkje tilfeldig.
— Eg synest det er ein god kombinasjon med trening og hudpleie. Då kjem eg inn der det allereie er aktivitet, seier Rivenes.
Kombinasjonen har Rivenes god erfaring med frå Bergen. Ho ser at den fungerer. I salongen tilbyr ho ansiktsbehandling, kroppsbehandling, fotpleie, voksing og alt til vipper og bryn.
— Eg har valt dei behandlingane som eg synest er kjekke å jobba med og som eg er god på, seier Rivenes.
Førebels er salongen open tre dagar i veka og annankvar laurdag. Til no har ho hatt det travelt, og ho håpar at det fortset slik. Om det er stor nok etterspurnad, opnar salongen éin dag til i veka i haust. Målet er å ha ein trygg og triveleg arbeidsplass.
Sambuar og altmoglegmann
Rivenes har budd i Kvam i sju år og har fått kjenna på at det ikkje er så lett å finna seg fast arbeid. Ho har vore innom helsevesen, apotek og hudpleiesalongen i Øystese, men har lengta etter ein fast jobb som kan kombinerast med familielivet.
Sambuaren til Rivenes, Svein Rune Rykkje, har prøvd å overtala henne til å starta opp tidlegare, men utan hell. Då ho nemnde Attrå for han, var han klar til å hjelpa til.
Rykkje har ansvar for økonomi og teknikk, og er elles ein slags altmoglegmann.
— Og så har han laga ei kjempeflott nettside til meg, seier Rivenes.
Gode tilbakemeldingar
Rivenes har fått gode tilbakemeldingar frå dei fyrste kundane, og trur det har å gjera med at kundane føler dei får den tida dei betalar for.
— Eg tek meg god tid til kundane. Det skal ikkje vera noka hast, seier Rivenes.
I alt har sambuarparet investert rundt 130.000 kroner. No har verksemda søkt om kring 36.000 kroner i tilskot frå kraftfondet i Kvam herad, til å dekkja utgifter til blant anna behandlingsstol.
