Handverkarar med hundrevis av kundar

Året før, då tomannsverksemda vart etablert i februar, var omsetninga 4,8 millionar kroner. Auken er på 52 prosent. Dagleg leiar John Asle Lie vurderer resultatet på 587.000 kroner i 2019 som godt.

– Korleis har de oppnådd eit slikt resultat?

– Med hard jobbing, seier Lie.

Verksemda, som består av Lie sjølv og Harald Brekke, vart etablert i februar 2018 og har til saman 18 års erfaring i faget. Firmaet held til på Skeie i Steinsdalen, bak den tidlegare skuletomta. Firmaet har hatt svært godt med oppdrag, og det er dei to svært glade for.

– Svært nøgde

– Det gjekk over all forventing. Me hadde ikkje i vår villaste fantasi trudd det skulle verta så mykje som det vart. Me er svært nøgde, seier Lie.

Brekke og Lie har fleire konkurrentar i Kvam.

– Kva er det som gjer at de har fått så mange oppdrag, trur du?

– Vonleg er det på grunn av god sørvis og at me er flinke i jobben vår. Me har eit godt rykte. Det er vona heile vegen, seier Lie.

– De har hatt ein kometkarriere?

– Ja, me har eigentleg det, seier den daglege leiaren.

Har avtale med lærling

Brekke og Lie søkte etter ein røyrleggjar til i januar, men har ikkje fått tilsett nokon. Men firmaet skal ta inn ein lærling, Jone Valland, som det er gjort avtale med. Han har allereie vore utplassert hjå verksemda.

Det største prosjektet firmaet har hatt, er slakteriet på Homlagarden på Aksnes. Det var stort for eit firma som berre tel to. Når verksemda har totalprosjekt, samarbeider Brekke og Lie som regel med ein elektrikar i Strandebarm som dei er svært nøgde med.

Brekke og Lie har hatt opp mot 500–600 oppdrag i året.

– Kva likar du best med arbeidet?

– Eg likar alt. Det fine med denne jobben er at ein har aldri to like dagar.

– Så det er stadig utfordringar òg, då?

– Ja, og det er det som er det fine. Du får bruka toppetasjen litt meir enn om det var det same kvar dag.

Takkar kundane

– Korleis ser du på framtida?

– Med koronaviruset veit ein ikkje korleis det vert, men me vonar på å få stabilt med arbeid og halda på kundane.

Brekke og Lie er påpasselege med hygienen når dei skal inn til kundar, og snakkar med dei på førehand.

– Me vert einige om ting, og me har mest lyst til å jobba i fred, seier den daglege leiaren.

Dei fleste jobbane er hjå private.

– Innkøyringsperiode av firmaet har gått bra, takka vere kundar som har brukt oss. Utan dei hadde det ikkje gått, så me ser fram til framhaldet, seier Lie.

Brekke og Lie tek på seg oppdrag også i Samnanger, Bergen, Os, Voss, Fusa, Kvinnherad og Tysnes innan nybygg, rehabilitering, sørvis og varmeanlegg.