– God plan for massar

Verksemda vil sikra i føresegnene at massane skal skipast ut, men ikkje før det er inngått avtale om levering i Noreg eller utlandet til mottakarar som er godkjende av styresmaktene.

Det meiner kommunen er ein god plan.

– Ein slik avtale vil ikkje vera mogleg å få stadfesta utan ein reguleringsplan i botnen. Massehandsaminga har slik vorte flytta opp i ressurspyramiden, frå deponering til bruk, men ikkje internt i planområdet. I tillegg blir det arbeidd med samfunnsgagnleg bruk av sprengstein i kommuneplanen sin arealdel. Det er difor pårekneleg at det vil vera gode, tilgjengelege areal for overskotsmassar, skriv verksemdleiar Wermund Vetrhus i verksemd for plan og samfunnsutvikling til Statsforvaltaren.

Som HF har skrive før, var ikkje Statsforvaltaren nøgd med at planframlegget ikkje sa noko om kvar tiltakshavaren skal gjera av dei store mengdene overskotsmassar i smoltprosjektet. Det spørsmålet dukka opp som fylgje av at ei stor, planlagd fylling i sjøen er teke ut av planen.

Hardanger Fishfarm har utarbeidd ein plan for massedisponering i dei ulike områda i planen. Berre små mengder av det kalkulerte masseoverskotet på 750.000 kubikkmeter frå driving av tunnelar og fjellhallar skal nyttast. Planen er altså at steinen skal seljast og i hovudsak fraktast bort med båt. Verksemda understrekar at det er uråd å inngå avtalar om sal før ein har ein reguleringsplan.