Forskar på fjernarbeid
Hardangerrådet kan inngå ein samarbeidsavtale med NORCE om å sjå på tilrettelegging for fjernarbeid.
Prosjektet kostar i alt 1 million kroner, og deltakarkommunane dekkjer minst 50 prosent. For Kvam vert det ein kostnad på 217.810 kroner, og for Ullensvang 266.221. kroner. Sparebankstiftinga krev at det vert dokumentert at prosjektet er fullfinansiert.
Hardangerrådet møtest torsdag 28. september for mellom anna å ta stilling til ein avtale om prosjektet. Det er planlagt å omfatta alle hardangerkommunane og Voss herad. Eit mål med prosjektet er å auka tilflyttinga til regionen.
Hardangerrådet er søkjar og eigar av prosjektet, medan Norwegian Research Centre AS (NORCE) leverer forskings- og utviklingsstenester.
Resultata av eit forprosjekt finansiert av Regionalt Forskingsfond Vestland, med Voss og Kvam herad som samarbeidspartnarar, syner at det finst moglegheiter for tilrettelegging av fjernarbeid. Desse kan vera innan ei rekkje produkt- og tenestekategoriar, inkludert lokale kontortilbod, tenester knytte til livsstil, sosiale arrangement, fagleg utvikling og strategisk samarbeid mellom kommunar og næringsliv for fjernarbeidarar.
Prosjektet skal munna ut i fleire leveransar, der den viktigaste er ein rapport som oppsummerer kunnskapsgrunnlaget frå studien av arbeidsgjevarane sin praksis for fjernarbeid. Inkludert i rapporten er HR-praksis for fjernarbeid, og styrkar, svake sider, moglegheiter og utfordringar i kvar kommune og på regionnivå.
Dinest skal prosjektet gjera greie for verkemiddel for tilrettelegging av fjernarbeid og skapa ein ambisjon om å etablera konkrete avtalar mellom ei gruppe av arbeidsgjevarar og kommunane i Hardanger.
