Fleire permitterte ved Hardanger bakeri
Administrerande direktør i Baker Brun, Ove Bruntveit, fortel at Hardanger Bakeri i Steinsdalen har opplevd eit større fall i omsetnaden på grunn av koronapandemien.
Bakeriet har halde mellombels stengt sidan 23. mars, og har sett seg nøydd til å avgrensa produksjonen og personalet.
Bruntveit merkar eit større fall i omsetnaden til hotell, reiseliv, restaurantar, barnehagar, grossistar og kantinekjeder, opplyser han i ein e-post til HF.
Han ynskjer ikkje å gje detaljar om omsetnaden, men fallet har ført til at han har måtta permittera ein større del av dei tilsette ved bakeriet.
– Lukkelegvis har me att litt volum, takka vere dei lokale kjøpmennene som ynskjer å ha brød frå Hardanger Bakeri i sortimentet, opplyser Bruntveit.
Han vil takka alle kundar som held fram med å kjøpa brød og støttar det lokale bakeriet.
– Me vonar sjølvsagt at flest mogleg vil halda fram med å kjøpa kortreist og lokalproduserte brød, og dermed støtta bakeriet gjennom ein utfordrande periode.
Bruntveit skriv at verksemda er avhengig av dei tilsette og ei rekkje manuelle prosessar for å få den ynskte, gode kvaliteten på varene.
Konditoriet vil vera stengt til leiinga ser korleis situasjonen utviklar seg.
For å sikra leveransane til kundane, har Hardanger Bakeri innført ein vernebuingsplan som jamleg vert oppdatert etter krav og informasjon frå helsestyresmaktene.
Opningstida på kundesørvis vert redusert.
