Feirar nytt bygg med konsert

Johan Skeie har sett opp ein ny hall med lager, verkstad og vaskehall nord for fylkesveg 49 nær Jonshøgdi. Dei 15 tilsette har fått nytt pauserom, møterom og kontor i bygget. Bedrifta har base på Kvamskogen og har størstedelen av omsetninga der. Difor var det ein naturleg stad å byggja hallen.

Det heile starta i 2021. 2. juledag sat Johan Skeie, dagleg leiar i firmaet, heime og keia seg. Då byrja han tenkja at han skulle hatt ein hall. Han lasta ned eit gratis teikneprogram og sette i gang.

– Det gjekk rett i myra, seier Skeie.

Likna ikkje

Sidan det var midt i juleferien, måtte han venta til 2. januar før han fekk hjelp. Då var kameraten Anders Nilsen klar for oppdraget. Skeie var med under teikneprosessen. Han sørgde for at Nilsen teikna hallen slik Skeie hadde sett føre seg. Allereie dagen etter vart teikningane sende til Arbeidstilsynet.

Etter nokre små justeringar vart søknaden send i februar. Bygginga starta allereie same året. Johan Skeie gjorde grunnarbeidet sjølv, medan Stål- og Landbruksbygg AS reiste hallen og leverte portar. Våren 2023 var han ferdig.

Sjølv om hallen ikkje liknar dei fyrste teikningane Skeie sjølv laga, har hallen blitt akkurat slik han hadde tenkt. I lagerhallen er det er reolar og god plass til oppbevaring. Om bilane køyrer inn den andre porten, er vaskehallen fyrste stopp. Der kan køyretøya spylast reine før dei vert parkerte over smørjegrava til reparasjon i andre enden.

– Tanken var at bilane skulle køyra inn på den eine sida og koma reine og ferdig fiksa ut på den andre sida, seier Skeie.

Namn etter faren

Totalt har hallen kosta 10–11 millionar kroner. Utanfor hallen byggjer selskapet no eit strøsandlager under tak.

Hallen har fått namnet B.O. Skeie-hallen. Han er oppkalla etter Bertil Ove Skeie, far til Johan.

– Eg lurte på kva hallen skulle heita. Så tenkte eg at det var ein fin gest til far min, som har gjort mykje bra her på Kvamskogen, seier Skeie.

Ein dag fekk han ideen om å laga til ein opningsfest for hallen. Skeie fortel at infrastrukturen til hyttetomtene som er selde i området, nesten er ferdig. Hallen har hatt eitt års innkøyringsperiode, og mesteparten av området utandørs er ferdig. Dermed passa det godt med ein innviingsfest.

– No har me dura på med maskinar i fem–seks år, så eg vil gje noko tilbake til hytteeigarane, seier Skeie.

Konsert og show

Sidan Skeie kjenner Frode Måkestad, vokalist i Gunslingers, var det lett å høyra med han om bandet var interessert i eit slikt oppdrag. Då byrja ballen å rulla. Måkestad har samarbeid med Kjell «Kjellen» Bigset, som stiller med humorshow og som konferansier. Skeie har nemleg invitert 100 gjester til middag før den offisielle opninga til helga. Når porten opnar, kan alle som ynskjer det, ta del i festen heilt gratis. Så lenge portane er opne, er arrangementet alkoholfritt, slik at born kan vera med på konserten.

Skeie fortel at anten ordføraren eller varaordføraren i Kvam kjem for å seia nokre ord, før «Kjellen» skal underhalda tilskodarane. Etterpå kjem Gunslingers på scena og held konsert.

– Me har plass til 750 personar inne. Resten må stå på utsida. Det vil stå høgtalarar både inne og ute, og porten er stor slik at alle ser scena, fortel Skeie.

Sjølv om konserten er ei takk til hyttefolket på Kvamskogen, kan kven som helst møta opp.