Eksklusiv meny i båthamna

Ein kan nyta både ein tapastallerken, spekemat, blåskjel og reker medan ein ser på båtar og høyrer lyden av bølgjebrus. Det er kokken Patrick Cavalli som står bak rettane. Han driv den nystarta bedrifta Hardanger Matkasse AS, og prøver å finna dei rette marknadsområda.

Då Hallvard Bjørgum tok kontakt på vegner av Norheimsund Gjestehamn og spurde om han ville levera mat til sommarkafeen, takka Cavalli ja.

– Det er kjekt å kunna bidra med noko ekstra til båtgjestane og alle som kjem innom. Sommaren er ganske stille og roleg elles, men her er det litt action, fortel Cavalli.

Lokale ungdommar har fått sommarjobb på kafeen, og kokken tykkjer det er kjekt at dei kan selja noko meir enn berre vaflar. Konseptet vart testa under Hardanger Trebåt- og Handverksfestival i juni. Cavalli fortel at tapastallerkenen slo godt an, både blant turistar og lokale. Retten har vorte ei merkevare for Hardanger Matkasse.

Kokken forklarer at det tek tid å laga tapas – det er ikkje berre å smella saman ei røre. Ein treng rundt ti ulike komponentar som må lagast frå botnen. Ingrediensane varierer med sesongen, men ein tallerken kan mellom anna bestå av soyakoka kylling, asiatiske scampi, spekeskinke og oliven, vårrullar og kjøtbollar på bønnesalat.

Ikkje i torevêr

Kafeen i hamna opna for fullt 1. juli, og planen er å halda det gåande heile sommaren.

– Me ynskjer å skapa eit samlingspunkt for både ung og gammal, seier Cavalli.

I tillegg til vanleg servering ynskjer han å tenkja utanfor boksen og arrangera temakveldar i løpet av sommaren. Då vert det ekstra fokus på ein bestemt matrett eller stil. Til dømes grilling, paella, brunsj eller buffé. Ifølgje han er businessen svært vêravhengig, så han håpar det held seg bra. Dersom det vert torevêr, er det ikkje noko poeng å halda ope.

Når HF er innom, skin sola, og intervjuet vert stadig avbrote av feriefolk som vil kjøpa is. Cavalli fortel at det ikkje har vore så mange båtar på besøk sidan trebåtfestivalen.

– Hardanger er jo ei perle i slikt vêr! Det kan til og med måla seg med Syden, meiner kokken.

Han flytta til Kvam i 2019, men fortel at han ikkje har møtt heile befolkninga endå. Det kjem seg kanskje i løpet av sommaren, for kokken har ikkje tenkt å reisa langt vekk.

– Det vert hamneferie her på meg i år, seier Cavalli med eit smil.

Betre kontroll

Dei fire ungdommane som jobbar på Bota i sommar, er vener av dottera til Cavalli. Han forklarer at jungeltelegrafen fungerer godt her i bygda, så han trong ikkje leita lenge for å finna arbeidskraft.

To av dei er Lilly Alida Eikrem og Leah Tveiten, som står i luka når HF er innom. Fyrstnemnde jobba her i fjor og er godt kjend med rutinane. Tveiten, derimot, har aldri hatt sommarjobb før. Ho tykkjer det er kjekt at ein må vera litt sjølvstendig i kafeen.

– Eg gler meg til å sjå korleis det går! Målet er gode pengar og blide kundar, fortel 16-åringen.

Eikrem tykkjer det er betre kontroll på kafeen no enn i fjor. Ho fortel at Cavalli stadig er innom og ser til at det går bra. I tillegg synest jentene at det er kjekt å kunna by på litt meir eksklusiv mat i tillegg til vaflar og kaffi, som det går mest av. Ungdommane «kickstarta» jobben under trebåtfestivalen.

– Det var stress! Men me fekk mykje inntekter, så det var verdt det, meiner Tveiten.

Etter at kafeen opna igjen i juli, har det ikkje vore like travle dagar. Jentene er einige om at det er keisamt på jobb når det ikkje kjem kundar. Då må dei sysselsetja seg sjølve med rydding eller vasking. Eikrem fortel at dei treffer på ein del turistar – både tyskarar og spanjolar – som set engelskkunnskapane på prøve.

– Kva heiter spekemat på engelsk?

– Det heiter berre spekemat, slår Eikrem fast.