Eit år på det jamne
Fleire lokale butikkar fortel om opp- og nedturar i 2024.
Arne Digernes, dagleg leiar i MX Sport Øystese AS, fortel at omsetninga i 2024 var omtrent som i 2023. Han påpeikar at dårleg vêr i haust gjorde at salet i butikken minka. Digernes seier at det trengst vêr som gjer at folk vil ut og handla og bruka utstyret dei investerer pengar i.
– Vintervarene har nesten berre vorte selde som julegåver, påpeikar Digernes.
Digernes opplyser at salet elles har vore som venta. Det er framleis god etterspurnad etter elsyklar. Sal av ski plar auka når snøen vert liggjande, fortel han.
Styreleiar i Mo Sport AS, Geir Mo, fortel at omsetninga til sportsbutikken i Norheimsund sentrum var ganske lik som i 2023.
– Det er nesten på krona likt, seier Geir Mo.
Han seier at butikken sel bra med elsyklar, som i dei føregåande åra. Trendar kan avgjera kva det vert selt mest av. Toppturpakkar og elsyklar har det vore stabilt sal av i lengre tid, påpeikar Mo.
Salet av frisbeear har auka i takt med at frisbeegolfbanar vart opna i Norheimsund og Ålvik, fortel Mo.
Påverka av vêr og prisauke
Jahn Tolo, dagleg leiar i Norheimsund Fargerike, fortel om ein liten nedgang i omsetninga. Han seier at dårleg vêr, særleg om sommaren, medverka til mindre sal av utandørsmåling. Butikken hadde omtrent like mange kundar som i 2023. Skilnaden ligg i kor mykje folk handlar.
– Me har omtrent same tal kundar, men verdien i handlekorga har gått ned, påpeikar Tolo.
Han trur at folk har vorte meir påpasselege med pengebruken, som fylgje av prisauken i samfunnet.
– Håpar på betre vêr
Tolo er også styreleiar i Norheimsund Næringslag. Han har inntrykk av at fleire av butikkjedene har dei same utfordringane som Norheimsund Fargerike. I tillegg er nokre butikkjeder meir utsette for konkurranse frå nettbutikkar, påpeikar han.
Tolo håpar at dyrtida går over, og at folk kan kjenna på stabilitet rundt eigen økonomi.
– Så håpar eg på betre vêr, seier Tolo.
Oppgang for CC Kle
Eigar av CC kle – tidlegare Match Norheimsund –, Cecilie Mo Vik, fortel at butikken har hatt auka omsetning i 2024. Ho trur det skuldast at butikken har nettbutikk i tillegg til dei fysiske lokala i handlesenteret ved Straumen.
– Det medfører at me kan overleva, fortel ho.
Talet på kundar i 2024 var omtrent som året før, fortel ho. Ho håpar å sjå fleire kundar i butikken i 2025.
