Byggjer større hall: – Ser målet i horisonten

Sidan Lid Jarnindustri vart etablert i 1948, har bedriftslokala vore gjennom kring tjue fysiske utvidingar. Behovet melde seg på nytt for om lag seks år sidan, då lagerplassen vart for liten og mange produkt måtte stå utandørs.

– Det er spesielt krevjande på vinterstid på grunn av snøen. Me må ha plastikk på alt som skal lagrast ute, seier Dag Rune Lid.

Han er son til grunnleggjaren av Lid Jarnindustri og har overordna ansvar for marknadsføring og IT i bedrifta, som går under varemerket «Dalen». Bedrifta utviklar og produserer traktormontert utstyr. Ifølgje Lid har salet auka dei siste åra. Det betyr at fleire hundre produkt treng ein stad å stå.

– Me vil byggja ein hall som kan lagra ferdigvarene våre, fortel Lid.

Det nye bygget skal også nyttast til å lasta i bilar og transportkonteinarar. Etter mykje fram og tilbake for å tilfredsstilla krav frå både Statens vegvesen og Kvam herad, enda bedrifta med ei planskisse på 3.200 rutemeter.

Ser lys i tunnelen

– Me ynskjer å skapa ein triveleg arbeidsplass, seier Lid.

Ifølgje han er det bra å ta i bruk ny teknologi for å letta arbeidet. Lid fortel at dette bidreg til god trivsel i bedrifta. Han tykkjer det er viktig å ha det ryddig både ute og inne, av omsyn til arbeidstakarane, naboane og alle som køyrer forbi.

– Alle likar å ha det reint og fint rundt seg, meiner Lid.

Det nye anlegget bidreg til å sikra dei 70 arbeidsplassane i bedrifta. Målet er å byggja hallen i løpet av hausten. Lid vonar å få taket på plass før snøen kjem. Då bedrifta byrja å arbeida med prosjektet, viste det seg at vegvesenet hadde låst området aust for industritomta med tanke på vegendring, riggområde og deponi.

– Det såg i utgangspunktet ganske mørkt ut, trass i at området var regulert til industri, fortel Lid.

Bedrifta gjekk uansett i gang med prosjektet. Ifølge Lid har Kvam herad gjort ein kjempeinnsats for å få eit godt samarbeid med og aksept frå fylkeskommunen og vegvesenet. Det som særleg skapa utfordringar i prosessen, var at tomta var aktuell som riggområde i samband med bygging av tunnelen til Eikedalen. Til sist vart dei naudsynte dispensasjonane gjevne.

Lid tykkjer likevel at prosjektet har teke meir tid enn venta. I tillegg har det kosta meir enn planlagt, på grunn av uventa krav som dukka opp undervegs.

– No ser me målet i horisonten. Det er me glade for, seier Lid.

Omsetninga aukar

Han meiner det er viktig å investera i nytt og effektivt utstyr for å overleva i ein stadig tøffare marknad. Ifølgje han har bedrifta fleire prosjekt i tankane, men fokuserer på éin ting om gongen.

– Me må byggja stein på stein, slik me har gjort gjennom alle våre 75 år, seier Lid.

Salet til bedrifta har gått i bølgjer sidan starten. Trykket aukar spesielt i kalde vintrar. Etter at straumprisane skaut i vêret for eit par år sidan, har det vore stor etterspurnad etter vedmaskiner. Dette har ført til lange leveringstider og god økonomisk gevinst. Frå 2017 til 2022 auka bedrifta si totale omsetning frå 70 til 135 millionar kroner.

– Salet av vedmaskiner er ein stor faktor i utviklinga, seier Lid.

Bedrifta eksporterer til England, USA og alperegionen i Europa. Ifølgje Lid er dagens svake kronekurs svært gunstig ved eksport, men utfordrande når det gjeld innkjøp av råvarer som vert betalte i euro.