Byggjer badstove og badestamp

Hotelldirektør Erlend Lundblad fortel at hotellet ynskte å invitera gjestene ut og ned mot fjorden. Slik starta ideen om ein utandørs lounge, eller salong, å ta form.

– Hagen har stort potensial. I tillegg har me verdas finaste utsikt mot fjord, fjell og fonn, seier Lundblad.

Tidlegare gjester har etterlyst ein slik samlingsstad ute. Det var med på å sparka prosjektet i gang.

Flotte omgjevnadar

Lundblad har vore hotelldirektør i Øystese i over eitt år. Han ser framover.

– Me ynskjer å gjera bygda endå meir attraktiv. Dette prosjektet kan bidra til det, fortel han.

Arbeidet byrja i midten av april, og no er området snart ferdig. Det skal vera heilt klart til bruk i sommar. Lundblad fortel at hotellet har nytta fleire dyktige, lokale leverandørar.

– Arbeidet gjekk fort då me fyrst kom i gang, seier han.

No gjenstår berre å måla saunaen, montera lydanlegg og få på plass ein heil haug med puter. Målet er å skapa ein spesiell atmosfære i hagen. Ifølgje Lundblad er det viktig å leggja til rette for gode opplevingar.

– Me ynskjer å få til ei god blanding av eksotisk spa-kjensle og ekte vestlandsnatur, fortel han.

Hotelldirektøren får ofte høyra frå besøkjande kor flott utsikta frå hagen er. Ifølgje han er det viktig for hotellet å framheva omgjevnadene.

– Me som lever her, vert kanskje litt blinde på kor flott naturen er. Det må me ikkje gløyma, seier Lundblad.

Fleire planar

«Loungeområdet» har fleire funksjonar. I tillegg til å hysa sauna og stamp skal det nyttast som ein ekstra terrasse med moglegheit for uteservering. Det er ope for både lokalbefolkninga og hotellgjester. Ein skal kunna reservera saunaen og badestampen. I tillegg planlegg hotellet å stella i stand ulike arrangement på staden.

– Me må prøva oss litt fram i starten og sjå korleis det utviklar seg. Eg trur me kan få til mykje spanande, fortel Lundblad.

Ifylgje han må hotellet leggja ein god plan før dei er klare til å arrangera. Ein må finpussa konseptet, fordela ansvar og finna ut korleis ting skal fungera i praksis. Direktøren tykkjer det er bra å ha noko å jobba mot.

– Det er veldig kjekt at me som hotell kan samarbeida om å laga noko nytt, fortel han.

Lundbad fortel at hotellet ynskjer å skapa større samanheng i resten av hagen. Neste prosjekt vert å få på plass ein gangsti frå hotellet til loungeområdet. Ifylgje Lundblad er det viktig å utvikla seg. Samtidig må ein ta vare på gode rutinar.

– Det finst ein balanse med tanke på drift og vedlikehald. Ein må alltid ha ein god plan i botnen, fortel han.

Prosjektet har fått 100.000 kroner i stønad frå det kommunale kraftfondet. Hotellet har også drøfta sjølve byggjetiltaket med Kvam herad. Her vart det konkludert med at det er unnateke søknadsplikt etter plan- og bygningslova.