Borar sjakt ved Stampaelva i Jondal
Stampaelva kraft AS er godt i gang med arbeidet på sjakta som skal gjera kraftverket i stand til å produsera 20,2 gigawattimar i året.
Produksjonen svarar til forbruket til 1.010 husstandar.
Noregs vassdrags- og energidirektorat (NVE) inspiserte Stampaelva kraftverk (SK) 16. september for å kontrollera at anlegget vert bygt i samsvar med den godkjende detaljplanen for miljø og landskap.
Oppfylgingspunkt for SK og Småkraft AS er å fylla tilbake vekstvillige massar heilt opp til urørt terreng når arealet ved inntaket og den delen av vassvegen som skal gravast ned, vert sett i stand, opplyser NVE.
Ein må sikra at avdekkingsmassar som ligg like ved elvekanten ved inntaket, ikkje rasar ut i elva. Dessutan må SK og Småkraft avslutta fyllinga for etablering av riggområde ved kraftstasjonen i samsvar med illustrasjonen i detaljplanen.
Inntaket er veglaust. Sjølve inntakskonstruksjonen er ferdig støypt. Arbeidet med å støypa dammen vert sett i gang i desse dagar. Demninga skal forblendast med naturstein.
Store delar av vassvegen går i fjell, og ei sjakt på 1.520 meter vert profilbora, opplyser prosjektleiar i Hywer AS for SK, Even Holst. Av denne er det til no bora 1.250 meter. Gjennomslag er forventa i løpet av 2020. Frå inntaket ned til toppen av sjakta, ei strekkje på om lag 60 meter, vert vassvegen graven ned.
Det er bygt ein om lag hundre meter lang permanent tilkomstveg frå Torsnesvegen til kraftstasjonsbygningen.
NVE legg til grunn at alle riggområde er mellombelse og at dei vert tilpassa til eksisterande terreng og naturleg vegeterte etter at anleggsperioden er avslutta.
Det er etablert eit sedimenteringsbasseng i riggområdet for å reinsa avløpsvatn frå boring av sjakta.
Arbeidet med kraftstasjonsbygget er planlagt starta i januar.
